Salyanda avtomobil aşıb, bir ailənin dörd üzvü xəsarət alıb, vəziyyətləri orta ağırdır - YENİLƏNİB

Salyanda yol qəzasına düşən bir ailənin dörd üzvünün vəziyyəti açıqlanıb.

TƏBİB-dən "Report"un sorğusuna cavab olaraq bildirilib ki, saat 07:40 radələrində baş verən qəzada xəsarət alanlar Salyan Rayon Mərkəzi Xəstəxanasının Təcili tibbi yardım şöbəsinə hospitalizasiya olunublar:

"Onlara zəruri tibbi xidmətlər göstərilib, hazırda müvafiq şöbələrdə müalicələri davam etdirilir. Vəziyyətləri isə orta ağırdır", - məlumatda qeyd olunur.

Salyanda baş verən yol qəzasında bir ailənin dörd üzvü xəsarət alıb.

“Report”un Aran bürosunun məlumatına görə, hadisə bu gün səhər saatlarında Ələt-Astara magistral yolunun rayon ərazisindən keçən hissəsində, Hacıoğlu istirahət mərkəzinin yaxınlığında qeydə alınıb.

Belə ki, hərəkətdə olan “Hyundai” markalı avtomobil anidən idarəetməni itirərək yolun kənarına aşıb.

Qəza nəticəsində avtomobildə olan bir ailənin üzvləri, Masallı rayon sakinləri, 1987-ci il təvəllüdlü Bağırova Könül Ərəstun qızı, 1989-cu il təvəllüdlü Bağırov Elşən Ərəstun oğlu, 1993-cü il təvəllüdlü Bağırova Pərvin Vüqar qızı və 2023-cü il təvəllüdlü Bağırova Ruqayyə Elşən qızı müxtəlif dərəcəli xəsarətlər alıblar.

Yaralılar Salyan Mərkəzi Rayon Xəstəxanasına yerləşdirilib.

Faktla bağlı araşdırma aparılır.