Qubada zəncirvari qəza olub, üç nəfər xəsarət alıb

Qubada üç nəfərin xəsarət alması ilə nəticələnən zəncirvari yol qəzası olub.

"Report"un Şimal bürosu xəbər verir ki, hadisə Quba-Xaçmaz yolunun Zərdabi qəsəbəsindən keçən hissəsində qeydə alınıb.

Belə ki, idarəetmədən çıxan “Mercedes” markalı avtomobil yolun kənarında dayanan “Mercedes” markalı digər avtomobilə, daha sonra isə traktor qoşqusuna çırpılıb.

Hadisə nəticəsində Quba rayon sakinləri, 1986-cı il təvəllüdlü Mustafayev Rahim Mehman oğlu, 1971-ci il təvəllüdlü Məcidov Nəbi Məhəmməd oğlu və 1965-ci il təvəllüdlü Məlikov Murad Çıraqalı oğlu müxtəlif dərəcəli bədən xəsarətləri alıblar.

Xəsarət alan şəxslər Quba Rayon Mərkəzi Xəstəxanasına çatdırılıblar.

Faktla bağlı araşdırma aparılır.