Qaxda yol qəzası olub, xəsarət alanlar var

Qax. 29 iyun. REPORT.AZ/ Qax rayonunda ağır yol-nəqliyyat hadisəsi baş verib. 

"Report"un Şimal-qərb bürosunun məlumatına görə, qəza Qax-Qorağan avtomobil yolunda qeydə alınıb.

Belə ki, rayonun Şıxlar kənd sakini,1962-ci il təvəllüdlü Əfqan Nəsib oğlu Osmanov idarə etdiyi 90-MG-445 dövlət nömrə nişanlı "VAZ-2107" markalı avtomobillə hərəkətdə olarkən idarəetməni itirib və maşını yolun kənarındakı ağaca çırpıb.

Nəticədə sürücü Ə.Osmanov və onun sərnişini, həmkəndlisi, 1979-cu il təvəllüdlü Azad Hümmət oğlu Əmrahov aldıqları müxtəlif dərəcəli bədən xəsarətləri ilə Qax Rayon Mərkəzi Xəstəxanasına çatdırılıblar. 

Xəstəxanadan verilən məlumata görə, hər iki yaralıya ilkin tibbi yardım göstərilib, vəziyyətləri orta-sabitdir.

Faktla bağlı araşdırma aparılır.