Bakı 20° C
https://static.report.az/photo/b579f449-8391-42df-908e-5391a3c62dd1.jpg
Bakı. 5 aprel. REPORT.AZ/ Məhkəmədə təqsirləndirilən şəxsin vəkilləri müdafiə çıxışı edib.
"Report" xəbər verir ki, onlar hüquqlarını müdafiə etdiyi şəxsin barəsində bəraət hökmünün çıxarılmasını istəyib.
Dövlət ittihamçısı vəkillərin çıxışı ilə tanış olmaq üçün məhkəmədən vaxt istəyib.
Proses aprelin 16-dək təxirə salınıb.
*** 15:39
Bakı. 5 aprel. REPORT.AZ/ Bakı Ağır Cinayətlər Məhkəməsində davam etdirilən prosesdə daha sonra sənədlərin tədqiqi mərhələsinin başlanması elan edilib.
"Report" xəbər verir ki, məhkəmədə avto qəza hadisəsindən sonra baş vermiş olayın videogörüntülərinə baxılıb.
R.Rəhimov bildirib ki, hadisədən bir qədər sonra işi aparan müstəntiq atası Akif Rəhimovla "Yeganə" şadlıq sarayında görüşüb: "Mən də orada olmuşam, qaçıb heç yerə getməmişəm".
Dövlət ittihamçısı çıxış edib. Prokuror çıxışında R.Rəhimovun 6 il müddətinə azadlıqdan məhrum edilməsini istəyib.
*** 15:26
Bakı. 5 aprel. REPORT.AZ/ Bakı Ağır Cinayətlər Məhkəməsində günün ikinci yarısında keçirilən prosesdə təqsirləndirilən Rəhim Rəhimovun yeni vəkili vəsatət qaldırıb.
"Report"un xəbərinə görə, o, yol-nəqliyyat hadisəsi ilə bağlı təkrar ekspertizanın keçirilməsini istəyib.
Məhkəmə vəsatəti təmin etməyib.
*** 10:49
Bakı. 5 aprel. REPORT.AZ/ Bakı Ağır Cinayətlər Məhkəməsində Bakıda ölümlə nəticələnən yol-nəqliyyat hadisəsini törətməkdə təqsirləndirilən Rəhim Rəhimovun cinayət işi üzrə məhkəmə iclası davam etdirilib.
"Report"un xəbərinə görə, hakim Novruz Kərimovun sədrliyi ilə keçirilən prosesdə təqsirləndirilən şəxsin vəkillərinin məhkəməyə gəlmədiyi elan olunub.
Proses günün ikinci yarısınadək təxirə salınıb.
Xatırladaq ki, dövlət ittihamçısı çıxışında R.Rəhimovun 6 il müddətinə azadlıqdan məhrum edilməsini istəmişdi.
Qeyd edək ki, Bakı şəhər prokurorluğunun və şəhər Baş Polis İdarəsinin ötən il noyabrın 8-də Səbail rayonunda baş vermiş qəza ilə bağlı yaydığı məlumata əsasən, Səbail rayonunun polis və prokurorluq əməkdaşları tərəfindən həyata keçirilmiş təxirəsalınmaz istintaq və əməliyyat-axtarış tədbirləri nəticəsində rayon ərazisində yol nəqliyyat hadisəsi törədərək hadisə yerindən qaçmış sürücü tutularaq istintaqa cəlb edilib.
Belə ki, ötən ilin noyabrın 8-də paytaxtın Səbail rayonu ərazisində naməlum sürücünün idarə etdiyi “Jeep Grand Cherokee” markalı 90-FO-007 dövlət nömrə nişanlı avtomobillə yolu keçmək istəyən 1975-ci il təvəllüdlü Əkbərova Könül Elton qızını vurması, sonuncunun aldığı xəsarətlərdən hadisə yerində vəfat etməsi və sürücünün hadisə yerindən qaçması faktına görə rayon Polis İdarəsinin İstintaq şöbəsində Cinayət Məcəlləsinin 263.2 (yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) və 264-cü (yol nəqliyyat hadisəsi yerindən qaçma) maddələri ilə cinayət işi başlanıb. Aparılmış təxirəsalınmaz istintaq-əməliyyat tədbirləri nəticəsində hadisə vaxtı qeyd edilən avtomobilin sürücülük hüququ olmayan, yetkinlik yaşına çatmayan - 2000-ci il təvəllüdlü Rəhim Rəhimov tərəfindən idarə edilməsi müəyyən edildiyindən cinayət işi Cinayət Məcəlləsinin 263-1.3 (nəqliyyat vasitələrini idarə etmək hüququ olmayan şəxs tərəfindən yol hərəkəti və nəqliyyat vasitələrinin istismarı qaydalarını pozma, ehtiyatsızlıqdan zərərçəkmiş şəxsin ölümünə səbəb olduqda) və 264-cü (yol nəqliyyat hadisəsi yerindən qaçma) maddələrinə tövsif edilib, R.Rəhimov noyabrın 29-da şübhəli şəxs qismində tutularaq müdafiəçi ilə təmin edilməklə dindirilib. O, iş üzrə təqsirləndirilən şəxs qismində cəlb olunaraq ona Cinayət Məcəlləsinin qeyd edilən maddələri ilə ittiham elan edilməklə məhkəmənin qərarı ilə barəsində həbs qətimkan tədbiri seçilib.
Xatırladaq ki, qəzanı törədən 17 yaşlı R.Rəhimov iş adamı, “Xırdalan Xəz” ASC-nin rəhbəri Akif Rəhimovun oğludur. A.Rəhimov isə “Yeganə” şadlıq sarayının rəhbəri Məmməd Rəhimovun qardaşıdır.
Qəzada ölən K.Ələkbərova isə şəhid Elton Ələkbərovun qızıdır.
