Paris. 20 yanvar. REPORT.AZ/ Həmvətənlərimiz Fransanın paytaxtı Parisdə 20 Yanvar faciəsinin 28 illiyi münasibətilə Azərbaycan Demokratik Respublikasının nümayəndələrinin məzarını ziyarət ediblər.
"Report"un Qərbi Avropa bürosu xəbər verir ki, Azərbaycanın Fransadakı səfiri Rəhman Mustafayev, ölkəmizin YUNESKO yanında daimi nümayəndəsi Anar Kərimov, Azərbaycan diasporunun nümayəndələri və digər şəxslər bu ölkədə dəfn olunmuş Əlimərdan bəy Topçubaşovun, Ceyhun bəy Hacibəyli və onun ailə üzvlərinin, Əkbərağa Şeyxülislamovun, Nadir Əsədullayevin və Azərbaycan Demokratik Respublikasının digər nümayəndələrinin məzarları üzərinə əklil qoyublar.
Ziyarətçilər Fransanın San-Klu, Bobinyi və Monparnas qəbiristanlıqlarına da gedərək orada dəfn olunan azərbaycanlıların məzarlarını ziyarət ediblər.