Oğuzda ağacları qanunsuz kəsib kömür hazırlayanlarla bağlı protokol tərtib olunub

Oğuz.2 yanvar REPORT.AZ/ Oğuz rayonunda ağacların qanunsuz kəsilməsinə, eləcə də kustar üsulla kömür hazırlanmasına qarşı tədbirlər davam etdirilir.

Bu barədə "Report"un Şimal-qərb bürosuna Daxili İşlər Nazirliyinin Mətbuat xidmətinin Şəki regional qrupundan məlumat verilib.

Bildirilib ki, ətraf mühitin mühafizəsi, təbiətdən istifadə və ekoloji təhlükəsizlik qaydaları əleyhinə olan inzibati xətalarla bağlı cari il ərzində Oğuz Rayon Polis Şöbəsinin əməkdaşları tərəfindən bir sıra tədbirlər görülüb, bu istiqamətdə İnzibati Xətalar Məcəlləsinin müvafiq maddələri ilə protokollar tərtib olunub.

Növbəti belə tədbirlər nəticəsində də qanunsuz olaraq kustar üsulla kömür istehsalı ilə məşğul olan 8 rayon sakininə qarşı inzibati qaydada tədbirlər görülüb, həmin quyuların istifadəsinə qadağa qoyulub: "Bu istiqamətdə tədbirlər davam etdirilir və gələcəkdə qanunvericiliyin ətraf mühitin mühafizəsi, təbiətdən istifadə, ekoloji təhlükəsizlik qaydaları əleyhinə olan tələblərin pozulması hallarının aşkarlanacağı təqdirdə qayda pozucularına qarşı müvafiq tədbirlər görüləcək".