Narkotik satmaqda təqsirləndirilən diş həkiminin məhkəməsi başlayıb

Bakı Ağır Cinayətlər Məhkəməsində narkotik satışında ittiham edilən Araz Niftəliyevin cinayət işi üzrə hazırlıq iclası keçirilib.

"Report"un xəbərinə görə, hakim İradə Həsənzadənin sədrliyi ilə keçirilən məhkəmə iclasında təqsirləndirilən şəxsin anket məlumatları dəqiqləşdirilib. Ailəli, himayəsində bir azyaşlı övladı olan Araz ali təhsillidir və həbs edilənə qədər diş həkimi kimi fəaliyyət göstərib.

Baxış iclası oktyabrın 21-nə təyin edilib.

Qeyd edək ki, Daxili İşlər Nazirliyinin məlumatına görə, Bakı Şəhər Baş Polis İdarəsi Narkotiklərlə Mübarizə İdarəsinin əməkdaşlarının həyata keçirdikləri növbəti uğurlu əməliyyat-axtarış tədbiri nəticəsində narkotik vasitələrin qanunsuz dövriyyəsi və satışı ilə məşğul olan şəxs ifşa edilib.

Belə ki, idarəyə Bakı şəhər sakini, 1990-cı il təvəllüdlü Araz Niftəliyevin narkotik vasitələrin satışı ilə məşğul olması barədə əməliyyat məlumatı daxil olub.

Həyata keçirilən tədbir zamanı həmin şəxs güclü təsirdici xassəyə malik narkotik vasitələr olan 1 kiloqram 517 qram heroini və 201,171 qram metamfetamini 18 000 dollar və 1000 manata şərti alıcıya satmaq istəyən zaman polislər tərəfindən saxlanılıb.

A.Niftəliyev ilkin ifadəsində qeyd edib ki, narkotik vasitələri şəxsiyyəti istintaqa məlum olmayan İran vətəndaşından satmaq məqsədilə alıb.

A.Niftəliyev narkotik vasitələri satan zaman öz adından yox, əsl peşəsinə uyğun olan “doktor” ləqəbindən istifadə edirmiş.

Ona Cinayət Məcəlləsinin 234.4.3-cü (satış məqsədilə külli miqdarda narkotik vasitələrin qanunsuz dövriyyəsi) ilə ittiham verilib.