Kriminal avtoritetin məhkəməsində şahid dindirilib: "Qətl söyüş üstündə oldu"

Bu gün Bakı Ağır Cinayətlər Məhkəməsində qətl törətməkdə təqsirləndirilən İbrahim Muxtarovun cinayət işi üzrə məhkəmə prosesində şahidlər dindirilib.

"Report"un xəbərinə görə, hakim Faiq Qəniyevin sədrliyi ilə keçirilən iclasda ifadə verən Xəlil Quliyev bildirib ki, qətl hadisəsi ilə bağlı heç bir məlumatı yoxdur.

O, təqsirləndirilən şəxsi və mərhumu tanımadığını deyib: "2014-cü ildə Rusiyadan Azərbaycana yeni gəlmişdim. Qonaqlarım var idi. Biz gecə klubunda rəqs edəndə Nicat adlı şəxs xanımlara söz atdı. Təbii ki, belə olan halda davamız düşdü. Tərslikdən bu qətl hadisəsi də eyni anda baş verib. Bu işlə bağlı heç bir aidiyyətim yoxdur. 2018-ci ildə xaricdən ölkəyə gətirildim. Davaya görə, xuliqanlıq maddəsi ilə 6 ay həbs cəzası almışam".

X.Quliyev söyləyib ki, gecə klubuna İ.Muxtarovun gəldiyini görməyib: "Ümumiyyətlə mənim onunla telefon danışığım olmayıb. Hadisədən əvvəl Rusiyaya geri qayıtmağım üçün bilet almışdım. Yəni, bu işə görə mənim qorxub xaricə qaçmağım absurddur".

Daha sonra şahidin istintaqda verdiyi ifadəsi elan olunub.

Həmçinin təqsirləndirilən İ.Muxtarovun istintaqdakı dindirilməsi proses iştirakçılarının diqqətinə çatdırılıb.

Şahid yenə də təqsirləndirilən şəxsi tanımadığını deyib.

Məhkəmədə şahid qismində Nicat Əbdülov da dindirilib. O, 2019-cu ildə məhkum başqa bir səbəbə görə olunduğunu deyib: "Gecə klubunda içkili idim, qıza toxundum. Mən orada İbrahimi görmədim. Mən Xəlillə dava etdim, ara qarışdı. Dava zamanı İbrahim orada yox idi. Qıza nalayiq ifadə işlətdiyim üçün Xəlil məni vurdu. Rəhmətlik Böyükağanı davadan sonra qaçanda görmüşəm. Ümumiyyətlə dava olana qədər İbrahimi tanımamışam".

Məhkəmənin növbəti iclası fevralın 3-nə təyin edilib.

Qeyd edək ki, hadisə 2014-cü ilin avqustun 16-da Abşeron rayonunda yerləşən gecə klublarının birində qeydə alınıb.

Belə ki, İ.Muxtarov Böyükağa Əliyevi qətlə yetirib. Daha sonra o, istintaqdan yayınıb, "İnterpol" xətti ilə axtarışa verilib və 2021-ci ildə həbs edilib.

İstintaq orqanları tərəfindən İ.Muxtarovun barəsində Cinayət Məcəlləsinin 120.2.2-ci (qəsdən adam öldürmə, xuliqanlıq niyyəti ilə adam öldürmə) maddəsi ilə ittiham irəli sürülüb.

Xatırladaq ki, İ.Muxtarovun kriminal aləmin üzvü olduğu bildirilir. O, "Vəziyyət İbrahim" kimi tanınır.