Yuxarı

“Günəşli” yatağında xilas edilən neftçi hadisənin təffərüatlarını danışıb - VİDEO

Dalğanın hündürlüyü 8 metrə qədərdi

Bakı. 5 dekabr. REPORT.AZ/ Hava çox küləkli idi, dalğanın hündürlüyü 8 metrə qədərdi, heç bir texnika, gəmilər yaxınlaşa bilmirdi, vertolyot düşə bilmirdi. “Report” xəbər verir ki, bunu ATV-yə müsahibəsində “Günəşli” yatağındakı 10 saylı dərin dəniz özülündə baş vermiş bədbəxt hadisənində xəsarət alan neftçi Rəşid Hüseynov bildirib.

Onun sözlərinə görə, havanın küləkli olması xilasetmə işlərini yubadırdı. “Biz qayıqlara mindik, sonra FHN gəlib bizi xilas elədi”, - R.Hüseynov deyib.

Qeyd edək ki, dekabrın 4-də saat 17:40 radələrində güclü tufan nəticəsində “Günəşli” yatağındakı 10 saylı dərin dəniz özülündə yüksək atmosfer təzyiqi ilə işləyən sualtı qaz xəttinin dayaq borusu qırılıb, boru kəməri zədələnib və yanğın baş verib.

Qəza baş verəndən indiyə kimi görülmüş genişmiqyaslı yanğınsöndürmə və xilasetmə işləri nəticəsində 32 nəfər təxliyə olunub, bir nəfərin cəsədi tapılıb, onlar dənizdən çıxarılaraq sahilə göndəriliblər.

Mərkəzi Neftçilər Xəstəxanasından bildirilib ki, 29 nəfər müraciət edib, onlardan 7 nəfər stasionar müalicəyə ehtiyacı olanlardır. İlkin tibbi yardım göstəriləndən sonra 1 nəfər yanıq mərkəzinə göndərilib, qalanlarına da ambulator müayinə olunandan sonra evinə göndərilib.



Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi