Gəncədə 10 300 manatlıq oğurluq edən şəxs tutuldu

Gəncədə evdə, mağazada və köşkdə oğurluq hadisəsi baş verib.

Bu barədə "Report"a Daxili İşlər Nazirliyinin (DİN) Mətbuat Xidmətindən məlumat verilib.

Belə ki, Nizami (Gəncə) RPİ əməkdaşlarının keçirdikləri əməliyyat-axtarış tədbirləri nəticəsində dekabrın 22-nə keçən gecə Gəncə şəhərindəki mağazaların birindən 4 820 manat dəyərində kserokopiya cihazı və ofis ləvazimatları oğurlamaqda şübhəli bilinən şəhər sakini, əvvəllər məhkum olunmuş A.Qurbanov saxlanılıb.

Ətrafında aparılan əməliyyat tədbirləri ilə onun 4 evdən 4 200 manat dəyərində 6 ədəd xalça, elektrik naqili, cihazlar, kombi, məişət və kosmetik əşyalar, 3 mağazadan pul, tütün məmulatı, kassa aparatı, 3 ədəd qapı tutacağı, 254 manat dəyərində geyim əşyaları, 1 lombarddan noutbuk və mobil telefon və 1 köşkdən isə 1 032 manat dəyərində tütün məmulatı və enerji içkiləri oğurlaması da müəyyən edilib.