DTX-nın həbs etdiyi gömrük əməkdaşı və digərlərinin məhkəmə istintaqı başa çatıb

DTX-nın həbs etdiyi gömrük əməkdaşı və digərlərinin məhkəmə istintaqı başa çatıb Məhkəmənin növbəti iclası yanvarın 11-nə təyin edilib
Hadisə
134
29 Dekabr , 2017 11:46
DTX-nın həbs etdiyi gömrük əməkdaşı və digərlərinin məhkəmə istintaqı başa çatıb

Bakı. 29 dekabr. REPORT.AZ/ Bu gün Bakı Ağır Cinayətlər Məhkəməsində Azərbaycandan Türkiyəyə 130 min manat dəyərində qızıl-zinət aşyaları və 190 min dollar pulu qaçaqmalçılıq yolu ilə aparmaqda təqsirləndirilən dəstə üzvləri - İlqar Əbilov, Elvin Yusubov, Rəşad Nəsibov və Kamran Əhmədovun cinayət işi üzrə məhkəmə iclası davam etdirilib.

"Report"un məlumatına görə, hakim Əfqan Hacıyevim sədrliyi ilə keçirilən prosesdə sənədlərin tədqiqi mərhələsinin başa çatdığı və məhkəmə istintaqının yekunlaşdığı elan olunub.

Məhkəmənin növbəti iclası yanvarın 11-nə təyin edilib. Həmin gün prokuror Fərid Nağıyevin təqsirləndirilən şəxslərə cəza istəyəcəyi gözlənilir.

Qeyd edək ki, Dövlət Gömrük Komitəsi və Dövlət Təhlükəsizliyi Xidmətinin (DTX) mətbuat xidmətlərinin yaydığı məlumata əsasən, Azərbaycan Respublikası Dövlət Gömrük Komitəsi və Dövlət Təhlükəsizliyi Xidməti tərəfindən 2017-ci il martın 8-də həyata keçirilmiş birgə tədbirlər nəticəsində qabaqcadan əlbir olan bir qrup şəxs halında tamah məqsədilə külli miqdarda, yəni 190 min ABŞ dolları məbləğində xarici valyuta və 132.207,52 manat dəyərində ümumi çəkisi 2 kq 279,44 qram təşkil edən 5 ədəd qızıl külçələrini qaçaqmalçılıq yolu ilə, yəni Azərbaycanın gömrük sərhədindən gömrük nəzarətindən gizli və bəyan etməməklə keçirərək Heydər Əliyev Beynəlxalq Hava Limanından təyyarə ilə Azərbaycandan Türkiyəyə aparmaq istəyən Azərbaycan vətəndaşları Elvin Yusubov, Rəşad Nəsibov, İlqar Əbilov və onlarla əlbir olan gömrük əməkdaşı Kamran Əhmədov saxlanılaraq cinayət məsuliyyətinə cəlb ediliblər.

Daha sonra onların barələrində həbs qətimkan tədbiri seçilib.

Son xəbərlər

Orphus sistemi