Dövlət Avtomobil Nəqliyyatı Xidməti Şəkidə 15 sürücünü cərimələyib

Şəki.14 fevral.REPORT.AZ/ Dövlət Avtomobil Nəqliyyatı Xidmətinin (DANX) Şəki regional şöbəsi Şəki şəhərində qaydaları pozan sürücülərə qarşı reyd keçirib.

"Report"un Şimal-qərb bürosunun məlumatına görə, reyd zamanı yükdaşıma, taksi fəaliyyəti, qeyri-qanuni sərnişin daşınması ilə məşğul olan sürücülər müəyyənləşdirilib və onlar haqqında müvafiq tədbirlər görülüb.

Reydin keçirilməsinin əsas məqsədi qeyri-qanuni olaraq Bakı istiqamətində sərnişin daşıyan mikroavtobusların aşkarlanması və onların sürücüləri haqqında inzibati qaydada tədbirlərin görülməsi olub.

DANX-ın regional şöbəsinin baş mütəxəssizi Tural Əhmədovun "Report"a verdiyi məlumata görə, reyd zamanı 15 sürücü haqqında müvafiq tədbirlər görülüb, 4 mikroavtobus isə cərimə meydançasına aparılıb.