Dələduzluqda təqsirləndirilən sabiq müstəntiqin apellyasiya şikayəti təmin edilməyib

Bakı. 22 fevral. REPORT.AZ/ Bakı Apellyasiya Məhkəməsində Bakı şəhər Prokurorluğunun dələduzluqda təqsirləndirilən sabiq müstəntiqi Müşfiq Abbasov barəsində olan hökmdən verilən apellyasiya şikayəti üzrə məhkəmə iclası başa çatıb. 

“Report”un xəbərinə görə, hakim Mirpaşa Hüseynovun sədrliyi ilə keçirilən prosesdə qərar elan olunub.

Qərara əsasən, M.Abbasovun apellyasiya şikayəti təmin edilməyib, birinci instansiya məhkəməsinin çıxardığı hökm dəyişdirilmədən qüvvədə saxlanılıb.

Qeyd edək ki, Bakı şəhər Prokurorluğunun İstintaq İdarəsinin böyük müstəntiqi M.Abbasov ötən il dələduzluqda təqsirli bilinərək həbs edilib. Daha sonra onun barəsində seçilmiş həbs qətimkan tədbiri ev dustaqlığı ilə əvəzlənib. O, məhkəmə zalından azadlığa buraxılıb.

M.Abbasov həmin iş üzrə yekun qərarın qəbulunadək vəzifəsindən kənarlaşdırılıb.

Səbail Rayon Məhkəməsinin hökmü ilə M.Abbasov barəsində 3 il sınaq müddəti təyin edilməklə, ona şərti cəza verilib.

Hökmdən narazı qalan M.Abbasov apellyasiya şikayəti ilə Bakı Apellyasiya Məhkəməsinə müraciət edib. O, şikayətində barəsində bəraət hökmünün çıxarılmasını istəyib.