Yuxarı

Cahangir Hacıyevin sürücüsü: “Üç kartımda 18 milyon avro, 32 milyon dollar, 10 milyon manat pul olub” - YENİLƏNİB

Sürücünün adına 11 milyon 928 min dollar kredit götürülüb

Bakı. 2 sentyabr. REPORT.AZ/ Günün ikinci yarısında Bakı Ağır Cinayətlər Məhkəməsində "Azərbaycan Beynəlxalq Bankı”nın keçmiş sədri Cahangir Hacıyev, Mərkəzi filialın direktorları işləmiş Yusif Ələkbərov və Anar Sultanov, Mərkəzi filialın müdiri işləmiş İlqar Abdullayev, bankın inzibati binalarının mühafizəsini həyata keçirən “İnter Security” MMC-nin baş direktoru İbrahim Hüseynov, bankın Nəqliyyat filialının direktoru işləmiş Kənan Orucov, bankın Nərimanov filialının direktoru işləmiş, hazırda "AFB Bank" ASC-nin Müşahidə Şurasının sədri olan Məmməd Cahangirov və Bakı Fındıq Zavodunun direktoru işləmiş Azad Cavadovun cinayət işi üzrə məhkəmə prosesi davam etdirilib.

“Report”un məlumatına görə, hakim Əfqan Hacıyevin sədrliyi ilə keçirilən keçirilən prosesdə Beynəlxalq Bankın “Suraxanı” filalının müdiri Fuad Bağırzadə ifadə verib.

O bildirib ki, 2011-ci ildə iki nəfərə kredit verilib, sənədlər də baş idarəyə göndərilib.

Şahid kimi “İnter Security” şirkətinin əməkdaşı Əjdər Babayev də ifadə verib. Şahid deyib ki, şirkətin rəhbərindən sənədlərə qol çəkməklə bağlı tapşırıq alıb və yerinə yetirib. Prokuror hazırda onun adına 400 min borc olduğunu söyləyib.

Beynəlxalq Bankın kreditlərə nəzarət departamentinin rəhbəri olmuş Akif Əliyev isə ifadəsində bildirib ki, fiziki şəxslərin adına külli miqdarda kreditlər ayrılıb və bununla bağlı ona göstərişləri C.Hacıyevdən alıb.

Beynəlxalq Bankın “Nəqliyyat” filialının xəzinədarı Rəfiqə Cabbarova ifadəsində bildirib ki, kredit alan şəxslərin özləri gəlib sənədləri imzalayılblar, lakin onlara pul verilməyib.

Bankın “Nəqliyyat” fialılın baş mühasibi Afət Yusifova isə şahid qismində dindirilərkən bildirib ki, kreditlərlə bağlı sənədləşdirmə işləri aparılıb, sənədlər üzərində pulların alındığı göstərilsə də, pulların verilib-verilməməsindən xəbəri olmayıb.

2002-ci ildən bankın İdarə Heyətinin sədrinin köməkçisi olan Anar Bəkirov bildirib ki, kredit verilmiş şəxslər arasında iki nəfər Rusiya vətəndaşına qeyri-qanuni kredit ayrılması müəyyən olunub. O, həmin kreditlərin verilməsi ilə bağlı Cahangir Hacıyevin göstəriş verdiyini  deyib.

“Nəqliyyat” fialının kredit şöbəsinin müdiri Kamran Rəhimli ifadəsində bildirib ki, kreditlərin sənədləşməsi onlar tərəfindən aparılıb və vəsaitlər müştərinin cari hesabına köçürülüb.

Məhkəmədə ifadə verənlərdən biri də Pərviz Həsənov olub. O, bankın “Səbail” fialının kredit şöbəsinin müdiri olub. O bildirib ki, kreditlər rəhbərliyin tapşırığı ilə ayrılıb.

Digər şahidlər prosesdə iştirak etmədiyindən məhkəmədə sentyabrın 5-dək fasilə elan olunub.

*** saat 14:20

Bakı. 2 sentyabr. REPORT.AZ/ Bu gün Bakı Ağır Cinayətlər Məhkəməsində "Azərbaycan Beynəlxalq Bankı”nın keçmiş sədri Cahangir Hacıyev, Mərkəzi filialın direktorları işləmiş Yusif Ələkbərov və Anar Sultanov, Mərkəzi filialın müdiri işləmiş İlqar Abdullayev, bankın inzibati binalarının mühafizəsini həyata keçirən “İnter Security” MMC-nin baş direktoru İbrahim Hüseynov, bankın Nəqliyyat filialının direktoru işləmiş Kənan Orucov, bankın Nərimanov filialının direktoru işləmiş, hazırda "AFB Bank" ASC-nin Müşahidə Şurasının sədri olan Məmməd Cahangirov və Bakı Fındıq Zavodunun direktoru işləmiş Azad Cavadovun cinayət işi üzrə məhkəmə prosesi davam etdirilib.

“Report”un məlumatına görə, hakim Əfqan Hacıyevin sədrliyi ilə keçirilən prosesdə şahid Kəmalə Hüseynova ifadə verib.

O, təqsirləndirilən şəxslərdən Azad Cavadovu tanıdığını, həyat yoldaşı ilə uşaqlıq dostu olduğunu deyib: "2011-ci ildə yoldaşım mənə gedib banka sənədlərə qol çəkmək lazım olduğunu dedi. Nəyə qol çəkdiyimdən xəbərsizəm. Hüquq-mühafizə orqanları məni idarəyə çağıranda bildim ki, adıma kredit var".

K.Hüseynovanın həyat yoldaşı İbrahim Hüseynov da dindirilib.

O, Ukraynada yaşadığını, Bakıya məzuniyyətə gələndə A.Cavadovun ona "sənədlərə qol çəkmək lazım olduğunu" söylədiyini bildirib.

Daha sonra C.Hacıyevin sürücüsü Aydın Mehdiyev ifadə verib. O, deyib ki, 1997-ci ildən 2008-ci ilə qədər C.Hacıyevin sürücüsü işləyib: “Sənədlərə qol çəkmək üçün mənə Mərkəzi filialın rəhbəri Anar Sultanov zəng etdi. Bu barədə Cahangir müəllimdən soruşdum. O mənə bildirdi ki, "kredit bankın biznes layhələri ilə bağlıdır, get imzala". Mən də onun dediyinə əməl etdim".

Prokurorun suallarını cavablandıran şahid A.Mehdiyev deyib ki, istintaq vaxtı onun adına 11 milyon 928 min dollar kredit götürülüb: "Bu pulların hara xərcləndiyini bilmirəm və kreditlərə görə, pul ödəməmişəm".

Prosesdə 2009-cu ilin yanvar ayından 2013-cü ilə kimi onun adına üç ədəd plastik kart götürüldüyü də məlum olub. Həmin kartlarda 18 milyon avro, 32 milyon dollar, 10 milyon manat pul olub. A.Mehdiyev həmin kartlardan xəbəri olmadığını, inidiyə kimi bir dəfə sənədlərə qol çəkdiyini deyib: "Adıma götürülən kreditlərin 80 fazi ödənilib".

C.Hacıyev isə kredilətləri sürücüsünə onun göstərişi ilə verildiyini etiraf edib: "Həmin kreditlər layihələrə xərclənib. Bütün ödəmələr və kreditlərin sərf olunduğu yerlər Vergilər Nazirliyinin açdığı cinayət işində var və həmin cinayət işinə xitam verilib".

Bundan sonra hazırda Beynəlxalq Bankın İdarə Heyətinin sədrinin müşaviri vəzifəsində çalışan Emil Mustafayev ifadə verib. O, 1994-cü ildən bankda müxtəlif vəzifələrdə çalışdığını deyib: "İttihamda yer alan 157 kredit və VİP kreditlər Cahangir Hacıyevin göstərişi ilə verilib. Kreditlərin verilməsi qanunsuz olub və bununla bağlı Cahangir Hacıyev işdən çıxarıldıqdan sonra Daxili İşlər Nazirliyinə rəsmi müraciət etmişəm. Bu cür kreditlər əslində İdarə Heyətində təmsil olunan şəxslərə və ya yaxınlarına verilərkən bankın Müşahidə Şurasının yekdil qərarı ilə olmalı idi. Ancaq bu barədə həmin qərarlar olmayıb. Digər iri həcmli kreditlər də təminatla verilməli olsa da, Cahangir Hacıyevin göstərişi ilə təminatsız verilib. Həmin kreditlərin məqsədi barədə bizə məlumat verilməyib. Göstərişə əsasən yalnız rəsmiləşdirilib və filiallar üzrə göndərilib”.

Proses günün ikinci yarısında davam etdiriləcək.

Qeyd edək ki, "Azərbaycan Beynəlxalq Bankı" Açıq Səhmdar Cəmiyyətinin İdarə Heyətinin sabiq sədri C.Hacıyev ötən il dekabrın 5-də həbs edilib. Onun barəsində Nərimanov Rayon Məhkəməsində 4 ay müddətinə həbs qətimkan tədbiri seçilib. C.Hacıyev və digər 7 şəxsin - Mərkəzi filialın direktorları işləmiş Y.Ələkbərov və A.Sultanov, Mərkəzi filialın müdiri işləmiş İ.Abdullayev, bankın inzibati binalarının mühafizəsini həyata keçirən “İnter Security” MMC-nin baş direktoru İ.Hüseynov, bankın Nəqliyyat filialının direktoru işləmiş K.Orucov, bankın Nərimanov filialının direktoru işləmiş, hazırda "AFB Bank" ASC-nin Müşahidə Şurasının sədri olan M.Cahangirov və Bakı Fındıq Zavodunun direktoru işləmiş A.Cavadovun Cinayət Məcəlləsinin 179.3.1, 179.3.2 (mütəşəkkil dəstə tərəfindən külli miqdarda mənimsəmə), 308.2 (vəzifə səlahiyyətlərindən sui-istifadə ağır nəticələrə səbəb olduqda), 309.2 (vəzifə səlahiyyətlərini aşma ağır nəticələrə səbəb olduqda), 313-cü (vəzifə saxtakarlığı), 228.1 və 228.4-cü (qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə) maddələri ilə təqsirləndirilmələrinə dair cinayət işinin istintaqı yekunlaşaraq təqsirləndirilən şəxslər, onların müdafiəçiləri iş materialları ilə tanış edilmiş və iş üzrə ittiham aktı Azərbaycan Respublikasının Baş Prokurorluğu tərəfindən iyulun 19-da təsdiq edilərək baxılması üçün aidiyyəti üzrə Bakı Ağır Cinayətlər Məhkəməsinə göndərilib.

Həmin şəxslər 211 milyonun manat pulu mənimsəməkdə təqsirli bilinirlər.

Xatırladaq ki, C.Hacıyev, İ.Abdullayev, Y.Ələkbərov və İ.Hüseynov barələrində həbs qətimkan tədbiri seçilib. Həmin şəxslər hazırda həbsdədirlər. Digər 4 nəfər isə zamindədir.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi