Vaqif Xaçatryanın məhkəməsi keçirilib, zərərçəkmişlərin ifadəsi elan olunub - YENİLƏNİB-4

Bu gün qanunsuz erməni silahlı birləşmələrinin tərkibində Xocalı rayonunun Meşəli kəndində soyqırımı törətməkdə təqsirləndirilən Vaqif Çerkezoviç Xaçatryanın cinayət işi üzrə növbəti məhkəmə prosesi keçirilib.

"Report" xəbər verir ki, məhkəmədə zərərçəkmiş şəxslərin ifadələri elan olunub.

Məhkəmənin növbəti iclası noyabrın 1-nə təyin edilib.

"Meşəlidə erməni quldurlarının hücumuna məruz qaldıq. Onlar bizim evi gülləbaran etdilər".

"Report" xəbər verir ki, bu fikirlər qanunsuz erməni silahlı birləşmələrinin tərkibində Xocalı rayonunun Meşəli kəndində soyqırımı törətməkdə təqsirləndirilən Vaqif Çerkezoviç Xaçatryanın cinayət işi üzrə növbəti məhkəmə prosesində zərərçəkmiş Firuzə Mehraliyevanın istintaqa ifadəsində qeyd edilib.

Zərərçəkmiş ifadəsində bildirib ki, kənddə maldarlıqla məşğul olub: "Həmin gün erməni quldurlarının hücumuna məruz qaldıq. Onlar bizim evi gülləbaran edəndə ailə üzvlərimizlə bərabər döşəmənin altında gizləndik. Onlar evimizə soxuldular. Ərimi yaralayıb, məni isə döydülər. Tofiq Hüseynovun dəstəsi gəlib bizi onların əlindən aldı. Nəzərinizə çatdırım ki, həmin ermənilər üzlərinə maska taxmışdılar. Ermənilər Allahverdi Novruzovu, anası Adilə və onun qızlarını öldürdülər, oğlu Baratı isə girov götürmüşdülər. Novruzun evinə hücum edənlər Armais, Ermes və Armen idi. Mən onları əvvəldən tanıyırdım, onlar Badara kəndində yaşayırdılar".

Məhkəmə prosesində zərərçəkmiş Gözəl Mehralıyevanın da ifadəsi elan edilib. O bildirib ki, Meşəliyə basqın zamanı Vaqifin dəstəsi zirehli texnika və artilleriyadan istifadə edirdilər.

"Onların hücumunun qarşısını almaq üçün özünümüdafiə dəstəmiz mübarizə aparırdı. Kənddə silahlar hamıdan yığıldığı üçün onlar Meşəlini asanlıqla ələ keçirdilər. Evimizi yandırdılar, canımızı güclə qurtara bildik. Heç bir əşya çıxara bilmədik", - onun ifadəsində qeyd edilib.

Prokuror: "Siz Meşəliyə hücum edənlərdən konkret kimləri tanıyırsınız?".

Zərərçəkmiş: "Daha çox Sarkisyan Ermes, Abramyan Armen, Vova, Kolya, Allahverdiyan Verdi, Slaviki, Burgen, Xaçatryan və Xoren adlı şəxsləri xatırlayıram.

"Onlar bizim malımızı talayıb və bizi yurdumuzdan didərgin salıblar".

"Report" xəbər verir ki, bu fikirlər qanunsuz erməni silahlı birləşmələrinin tərkibində Xocalı rayonunun Meşəli kəndində soyqırımı törətməkdə təqsirləndirilən Vaqif Çerkezoviç Xaçatryanın cinayət işi üzrə növbəti məhkəmə prosesində zərərçəkmiş Elnarə Mehraliyevanın istintaqa ifadəsində qeyd edilib.

E.Mehraliyeva ifadəsində bildirib ki, Meşəli kəndi işğal ediləndə onun 10 yaşı olub: "Mən valideynlərim və qohumlarımdan eşitmişəm ki, ermənilər bizə qarşı vəhşilik ediblər və bizi qırıblar. Onlar bizim malımızı talayıb, bizi yurdumuzdan didərgin salıblar. Novruz kişi və onun qızını Xaçatryanın dəstəsi öldürdü".

Daha sonra məhkəmə prosesində bildirilib ki, 3 zərərçəkmiş şəxs üzrlü səbəbdən ifadə verməyə gəlməyəcəklərinə görə məhkəməyə teleqramla müraciət ediblər.

Onlar istintaqa verdikləri ifadəni təsdiq ediblər.

Bu gün qanunsuz erməni silahlı birləşmələrinin tərkibində Xocalı rayonunun Meşəli kəndində soyqırımı törətməkdə təqsirləndirilən Vaqif Çerkezoviç Xaçatryanın cinayət işi üzrə növbəti məhkəmə prosesi başlayıb.

"Report" xəbər verir ki, cinayət işi Yasamal Rayon Məhkəməsinin inzibati binasında Bakı Hərbi Məhkəməsinin hakimi Zeynal Ağayevin sədrliyi ilə araşdırılır.

Məhkəmə prosesində zərərçəkmiş şəxslərin istintaqda verdiyi ifadələr elan edilir.

3 zərərçəkmiş şəxs üzürlü səbəbdən ifadə üçün prosesə gələ bilməyiblər. Onlar məhkəməyə müraciət edərək istintaqa verdikləri ifadəni təsdiqləyiblər. Hazırda həmin ifadə elan edilir.

Bu gün qanunsuz erməni silahlı birləşmələrinin tərkibində Xocalı rayonunun Meşəli kəndində soyqırımı törətməkdə təqsirləndirilən Xaçatryan Vaqif Çerkezoviçin cinayət işi üzrə növbəti məhkəmə keçiriləcək.

"Report" xəbər verir ki, cinayət işi Yasamal Rayon Məhkəməsinin inzibati binasında Bakı Hərbi Məhkəməsinin hakimi Zeynal Ağayevin sədrliyi ilə araşdırılır.

Məhkəmə prosesində zərərçəkmiş şəxslər ifadə verəcəklər.

Qeyd edək ki, oktyabrın 18-də keçirilmiş məhkəmədə prokuror ittiham aktını elan edib. İş üzrə zərərçəkmiş kimi 58 vətəndaş və Xocalı Rayon İcra Hakimiyyəti tanınıb.

Xatırladaq ki, V.Xaçatryanın müdafiəçisi Natiq Bəybalayev səhhəti ilə bağlı məhkəməyə müraciət edib. O, daha müdafiə çıxışlarına gələ bilməyəcəyini bildirib. Bundan sonra Xaçatryanın vəkili Radmina Abulova olacaq.

Qeyd edək ki, Vaqif Xaçatryanın iştirakı ilə Qarabağ iqtisadi rayonunda yaşayan, həmçinin Ermənistan Respublikasından gəlmiş millətçi ermənilərdən ibarət yaradılmış, Azərbaycan Respublikasının qanunvericiliyi ilə nəzərdə tutulmayan silahlı hərbi birləşmələrdən ibarət cinayətkar birliyin tərkibində Xocalı (keçmiş Əsgəran rayonu ərazisində) rayonunun Meşəli kəndində yerli azərbaycanlı əhaliyə qarşı törədilmiş soyqırımı, təqib etmə, didərgin salma, silahlı münaqişə zamanı beynəlxalq humanitar hüquq normalarını pozma cinayətləri nəticəsində ümumilikdə 27 nəfər qəsdən öldürülüb, 21 nəfər müxtəlif dərəcəli bədən xəsarətləri alıb, 2 nəfər kənd sakini girov götürülüb, 81 ailə təsərrüfatından ibarət 340 nəfər daimi yaşayış yerlərindən Azərbaycan Respublikasının digər ərazilərinə didərgin salınıb, kənd sakinlərinə ümumilikdə 13 568 060 manat, dövlətə isə 130 800 manat məbləğində maddi ziyan vurulub.

12 noyabr 2013-cü il tarixdə Xaçatryan Vaqif Çerkezoviç barəsində Cinayət Məcəlləsinin 103 və 107-ci maddələri ilə təqsirləndirilən şəxs qismində cəlb olunmasına dair qərar qəbul edilib, 14 noyabr 2013-cü il tarixdə Bakı şəhəri Nərimanov rayon məhkəməsinin qərarı ilə barəsində həbs qətimkan tədbiri seçilib və 21 noyabr 2013-cü il tarixdə axtarışı elan edilərək müvafiq sənədlər Daxili İşlər Nazirliyinin Baş Cinayət Axtarışı İdarəsinə və İnterpolun Azərbaycandakı Milli Mərkəzi Bürosuna göndərilib.

29 iyul 2023-cü il tarixdə Xaçatryan Vaqif Çerkezoviç səhhəti ilə bağlı Ermənistan Respublikasının ərazisinə keçmək istəyən zaman Laçın sərhəd-buraxılış məntəqəsində saxlanılaraq istintaqa təqdim olunub və həmin tarixdə ona Cinayət Məcəlləsinin 103 və 107-ci maddələrində nəzərdə tutulmuş ittiham elan edilərək barəsində 3 ay müddətinə həbs qətimkan tədbiri seçilib.

Bu il sentyabrın 22-də təqsirləndirilən şəxs Vaqif Xaçatryana Cinayət Məcəlləsinin müvafiq maddələri ilə yenidən ittiham elan edilib və sentyabrın 29-da isə cinayət işi üzrə ibtidai istintaq tamamlanaraq baxılması üçün aidiyyəti üzrə Bakı Hərbi Məhkəməsinə göndərilib.