Bakıda gəncləri bıçaqla hədələyərək telefonunu alan keçmiş məhkuma hökm oxunub

Bakı Ağır Cinayətlər Məhkəməsində quldurluqda təqsirləndirilən Röyal Səfərovun cinayət işi üzrə məhkəmə prosesi başa çatıb.

"Report"un xəbərinə görə, hakim Ramella Allahverdiyevanın sədrlik etdiyi kollegiyanın hökmü ilə R.Səfərov 8 il müddətinə azadlıqdan məhrum edilib.

O, Cinayət Məcəlləsinin 181.2.5-ci (quldurluq-silah və ya silah qismində istifadə edilən əşyalar tətbiq edilməklə törədildikdə) maddəsi ilə təqsirli bilinib.

Qeyd edək ki, hadisə bu il fevralın 14-də Sabunçu rayonunda baş verib.

Bakı şəhər sakini, əvvəllər oğurluğa görə məhkum olunmuş  Röyal Səfərov Aydınbəyov küçəsində, paytaxt sakini Toğrul Qəhrəmanova bıçaqla hədə-qorxu gələrək ona məxsus mobil telefonunu əlindən alıb və hadisə yerindən uzaqlaşıb.

Araşdırma zamanı 1993-cü il təvəllüdlü R.Səfərovun rayon ərazisində daha bir gənc qıza qarşı quldurluq edib mobil telefonunu əlindən aldığı məlum olub.