Bakıda 18 yaşlı gənci cərəyan vuraraq öldürüb, araşdırma aparılır - YENİLƏNİB

Bakıda 18 yaşlı oğlanın elektrik cərəyanı vurması nəticəsində ölməsi faktı üzrə araşdırma aparılır.

Bu barədə "Report"a Baş Prokurorluğun Mətbuat xidmətindən bildirilib.

Qeyd edilib ki, iyulun 29-da paytaxtın Xətai rayonu ərazisində 2006-cı il təvəllüdlü Elmir Qəhrəmanovun 245 saylı orta məktəbin həyətinə hasardan daxil olmaq istəyərkən elektrik cərəyanı vurması nəticəsində ölməsi faktı üzrə Xətai rayon prokurorluğunda araşdırma aparılır.

Bakıda 18 yaşlı gənci elektrik cərəyanı vurub.

"Report"un əldə etdiyi xəbərə görə, hadisə Xətai rayonu Cavanşir küçəsində yerləşən 245 saylı tam orta məktəbin həyətində qeydə alınıb.

Bakı şəhər sakini, 2006-cı il təvəllüdlü Elmir Bəhruz oğlu Qəhrəmanov elektrik cərəyanı vurması nəticəsində ölüb.

Faktla bağlı araşdırma aparılır.

Həmin təhsil müəssisəsindən isə "Report"a bildirilib ki, iyulun 29-da saat 20:40 radələrində məktəbin yaxınlığında təxminən 17-18 yaşlı gənci elektrik cərəyanı vurub: "Məktəbin gözətçisi kənardan gələn səs-küyə küçəyə çıxaraq hadisənin şahidi olub və dərhal təcili tibbi yardıma müraciət edib. Həmin gənc məktəbin şagird kontingentinə daxil deyil və bununla bağlı yayılan məlumatlar yanlışdır".