Bakıda məhbus üçün gətirilən tortdan telefon çıxıb

Bakı. 30 yanvar. REPORT.AZ/ Ədliyyə Nazirliyi Penitensiar xidmətin Baş idarəsinin və Bakı İstintaq təcridxanasının əməkdaşları tərəfindən həyata keçirilmiş əməliyyat-axtarış tədbirləri nəticəsində müəssisəyə qadağan olunmuş əşyaların keçirilməsi cəhdinin qarşısı alınıb.

Bu barədə “Report”a PX-nin İctimaiyyətlə əlaqələr şöbəsindən məlumat verilib.

Məlumata görə, Cinayət Məcəlləsinin 120.2.2; 120.2.2 və 221.3-cü maddələrinə əsasən təqsirli bilinərək həbs edilmiş şəxs Ağayev Arif Abdulla oğluna Bakı şəhəri Xəzər rayonu Binə qəsəbə sakini Əliyev Nizami Kəriməli oğlu tərəfindən gətirilmiş sovqata baxış keçirilən zaman sovqatda olan tortun altında sellofana bükülərək xüsusi üsulla gizlədilmiş, daxilində “Sim” danışıq kartı olan bir ədəd “Samsung A5” və daxilində “Sim”danışıq kartı olan bir ədəd “Samsung A3” markalı mobil telefon aparatları aşkar edilərək götürülüb.

Fakt üzrə toplanılmış materiallar hüquqi qiymət verilməsi üçün Ədliyyə Nazirliyinin İstintaq İdarəsinə göndərilib.