DİN: Əhmədli qəsəbəsindəki kütləvi dava ilə bağlı təhqiqata başlanılıb - YENİLƏNİB

Bakının Xətai rayonunun Əhmədli qəsəbəsində baş verən kütləvi dava ilə bağlı təhqiqat araşdırmasına başlanılıb.

Bu barədə "Report"a Daxili İşlər Nazirliyinin (DİN) Mətbuat Xidmətindən məlumat verilib.

Bildirilib ki, polis əməkdaşları hadisədən məlumatlıdırlar:

"Ərazi üzrə polis orqanında təhqiqat araşdırması başlanılıb. Əlavə məlumat veriləcək".

Bakıda Əhmədli qəsəbəsində kütləvi dava baş verib.

Hadisə şahidlərinin “Report”a verdiyi məlumata görə, davaya səbəb az əvvəl başa çatan “Fənərbağça” - “Qalatasaray” futbol oyunu olub. Belə ki, hər iki klubun fanatları arasında oyun bitəndən sonra mübahisə yaranıb. Əlbəyaxa dava polisin müdaxiləsindən sonra dayandırılıb.

Hadisə ilə əlaqədar bir neçə nəfərin saxlanıldığı bildirilir.