Yuxarı

Bakıda keçmiş nazirin xalası oğlunu qətlə yetirməkdə təqsirləndirilən qadının cəzası azaldılıb

Bakıda keçmiş nazirin xalası oğlunu qətlə yetirməkdə təqsirləndirilən qadının cəzası azaldılıb
Birinci instansiya məhkəməsinin çıxardığı hökm dəyişdirilib

Bakı. 10 iyun. REPORT.AZ/ Bakı Apellyasiya Məhkəməsində ərini qətlə yetirməkdə təqsirləndirilən Xalidə İsgəndərovanın barəsində olan hökmdən verilən apellyasiya şikayəti üzrə məhkəmə iclası başa çatıb.

Bu barədə "Report"a X.İsgəndərovanın vəkil Abuzər Mütəllimov məlumat verib.

Onun sözlərinə görə, hakim İlqar Murquzovun sədrliyi ilə keçirilən prosesdə qərar elan olunub. Qərara əsasən, birinci instansiya məhkəməsinin çıxardığı hökm dəyişdirilib. Belə ki, X.İsgəndərovanın 18 il müddətinə azadlıqdan məhrumetmə cəzası 16 ilə endirilib.

Qeyd edək ki, qətl hadisəsi 2014-cü ilin sentyabr ayında baş verib. 1964-cü il təvəllüdlü Füzuli Haqverdi oğlu İsgəndərov yaşadığı evin yaxınlığında amansızlıqla öldürülüb. Bakı Şəhər Prokurorluğu və Nizami Rayon Polis İdarəsi əməkdaşlarının keçirdiyi əməliyyat-axtarış tədbirləri zamanı hadisənin mərhumun həyat yoldaşı, paytaxt sakini, 1969-cu il təvəllüdlü Xalidə İsgəndərova tərəfindən törədildiyi məlum olub. X.İsgəndərova şübhəli şəxs qismində saxlanılıb.

2015-ci il noyabrın 3-də Bakı Ağır Cinayətlər Məhkəməsində keçirilən iclasda X.İsgəndərovanın vəkili vəsatətlə çıxış edib. O, cinayət işinin materialları ilə tanış olduqlarını, cinayəti zərərçəkənin həyat yoldaşı X.İsgəndərova tərəfindən törədilmədiyini və istintaq zamanı cinayət işinin sübutlarının saxtalaşdırıldığını və kobud səhvə yol verildiyini bildirib. Dövlət ittihamçısı çıxış edərək bildirib ki, qaldırılan vəsatət əsassızdır. Amma hakimlər kollegiyası vəsatət təmin edib. Kobud qayda pozuntularının qeydə alınmasına görə iş istintaqa qaytarılıb. Həbs qətimkan tədbiri isə dəyişdirilmədən saxlanılıb.

Ötən il senytabrın 14-də Bakı Ağır Cinayətlər Məhkəməsinin hökmü ilə X.İsgəndərova 18 il müddətinə azadlıqdan məhrum edilib. Hökmdən narazı qalan məhkum apellyasiya şikayəti verərək barəsində bəraət hökmünün çıxarılmasını istəyib. Zərərçəkmişin hüquqi nümayəndəsi də Bakı Apellyasiya Məhkəməsinə müraciət edərək cəzanın artırılmasını tələb ediblər.

Xatırladaq ki, qətlə yetirilən F.İsgəndərov uzun illər Daşınmaz Əmlak üzrə Dövlət Reyestri Xidmətinin rəis müavini olub. O, sabiq maliyyə naziri Əvəz Ələkbərovun xalası oğludur.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi