Bakıda bığ saxlamasına irad bildirən dostunu bıçaqlayan şəxsə hökm oxunub

Bakı Ağır Cinayətlər Məhkəməsində tanışını bıçaqlayan Aleksandır Labutovun cinayət işi üzrə məhkəmə prosesi başa çatıb.

"Report" xəbər verir ki, hakim İlham Mahmudovun sədrliyi ilə keçirilən prosesdə hökm oxunub.

Hökmə əsasən, A.Labutov 6 il müddətinə azadlıqdan məhrum edilib.

Qeyd edək ki, hadisə bu ilin iyul ayında paytaxtın Zığ qəsəbəsində qeydə alınıb.

Belə ki, A.Labutov tanışı Müslüm Qurbanovla birlikdə aptekdən aldıqları 96 faizlik tibbi spirtə su qataraq içiblər. Sərxoş hala düşdükdən sonra M.Qurbanov A.Labutova bığ saxlamasını irad bildirib və qırxmasını tələb edib. Buna etiraz edən A.Labutov dostunu bıçaqlayıb.

Xəstəxanaya çatdırılan M.Qurbanovun həyatını xilas etmək mümkün olub.