Bakıda 17 gün əvvəl döyülən zərgər ölüb

Bakı. 1 mart. REPORT.AZ/ Bakıda 17 gün əvvəl döyülən ahıl kişi ölüb.

"Report"un xəbərinə görə, hadisə Suraxanı rayonunda qeydə alınıb.

Belə ki, Hövsan qəsəbəsində Şabanov küçəsi ev 32-də yaşayan 1945-ci il təvəllüdlü Əliyev Yavər Nemət oğlu 3 saylı Şəhər Klinik Xəstəxanasında dünyasını dəyişib. Həkimlər onun daxili qanaxmadan öldüyünü bildirib.

Y.Əliyevin meyiti Məhkəmə Tibbi Ekspertiza və Patoloji Anatomiya Birliyinə təhvil verilib.

Faktla bağlı Suraxanı Rayon Polis İdarəsində cinayət işi başlanılıb.

Xatırladaq ki, Y.Əliyevin evinə quldur basqını olub. 3 naməlum şəxs onu döyərək pul və qızıl-zinət əşyalarını tələb edib. Hazırda cinayət əməlini törədən şəxslərin axtarışı davam etdirilir.

Qeyd edək ki, Y.Əliyev zərgərlik fəaliyyəti ilə məşğul olub.