Azərbaycanın Xalq artisti vəfat edib

Azərbaycan Dövlət Akademik Opera və Balet Teatrının solisti, Beynəlxalq opera festivalları laureatı, Azərbaycanın Xalq artisti, Prezident mükafatçısı, baş opera müğənnisi Əli Əsgərov dünyasını dəyişib.

“Report” xəbər verir ki, Əli Əsgərov 62 yaşında müalicə aldığı xəstəxanada vəfat edib.

Opera və Balet Teatrının mətbuat katibi Şükufə Ağamirzəyeva bildirib ki, baş opera müğənnisi ötən gün insult keçirib və müalicə üçün xəstəxanaya yerləşdirilib: "Şəxsən teatrın rəhbərliyi onun səhhəti ilə maraqlanırdı. Lakin, həkimlərin səyinə baxmayaraq onun həyatını xilas etmək mümkün olmayıb".

Qeyd edək ki, Əli Rəhim oğlu Əsgərov 25 noyabr 1961-ci ildə Bakıda anadan olub. Ü.Hacıbəyli adina Azərbaycan Dövlət Konservatoriyasının (indiki Bakı Musiqi Akademiyası) vokal şöbəsini və aspiranturasını bitirib.

1989-cu ildən Akademik Opera və Balet Teatrının solisti idi. Teatrın səhnəsində bir çox opera tamaşalarında, eləcə də Fransa, Almaniya, Rusiya, Türkiyə, Ukrayna, Gürcüstan və s. ölkələrdə opera festivallarında, vokal müsabiqələrində çıxış edib, laureat adını qazanıb. 1997-ci ildə Bakıda Bülbül adına Vokalçılarin I Beynəlxalq Müsabiqəsinin “Qran Pri” mükafatçısı olub.

1998-ci ildə Azərbaycan Respublikasının “Əməkdar artisti”, 2012-ci ildə “Xalq artisti” fəxri adlarına, dəfələrlə Prezident mükafatına layiq görülüb.