Yuxarı
    Bağlamaq

    "Akif Çovdarovun işi"ndə zərərçəkmiş: "Atamdan 500 min dollar tələb etdilər"

    Məhkəmənin növbəti iclası fevralın 13-nə təyin edilib

    İlk xəbər saat 15:01-də verilib

    Bakı. 8 fevral. REPORT.AZ/ Bu gün Sabunçu Rayon Məhkəməsinin inzibati binasında ləğv edilmiş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmə iclası davam etdirilib.

    “Report”un məlumatına görə, Bakı Hərbi Məhkəməsinin sədri Həbib Həsənovun sədrliyi ilə qapalı keçirilən prosesdə Kürdəmir rayonunda yerləşən "Xatirə" restoranı epizodu üzrə şahidlər dindirilib.

    Şahid qismində hazırda Kürdəmir Rayon Bələdiyyəsinin sədri vəzifəsində çalışan Nofəl Qasımov ifadə verib. O bildirib ki, 2000-ci ildən sonra həmin restoran işləməyib: "Həmin ərazidə olan torpaq ərazisini Şeyman İmanova qeyri-rəsmi şəkildə icarəyə vermişdik. Özümüz o ərazini ona vermişdik ki, qonşu rayonların heyvanları kəndin əkin sahələrinə girməsin".

    Daha sonra Kürdəmir Rayon İcra Şöbəsinin əməkdaşı Hikmət Quliyev dindirilib. O deyib ki, 2008-ci ildə "RAF-2006" MMC və zərərçəkmiş Şehman İmanovun məhkəmə çəkişməsindən sonra iddiaçı tərəf həmin restorana yol açılması ilə bağlı çıxarılmış qətnaməni almağa gəlməyib: "Hətta borclu tərəf Fəttah Seyidov gəldi ki, yol açılıb, gəlsinlər qətnaməni götürsünlər. Biz onları axtardıq, bildiriş göndərdik. Buna baxmayaraq, tələbkar icra şöbəsinə gəlmədi".

    Zərərçəkmiş Ş.İmanov vəkillərin suallarını cavablandırarkən qeyd edib ki, həmin restoranın yanında olan torpaq ərazisində pambıq əkib, heyvan saxlayıb.

    Günün ikinci yarısında davam etdirilən prosesdə Kürdəmir Rayon Bələdiyyəsinin sədri vəzifəsində çalışan Nofəl Qasımov vəkillərin suallarını cavablandırıb. O, istintaqa verdiyi ifadəsini təsdiqləmədiyini və Akif Çovdarovu tanımadığını bildirib. 

    Daha sonra zərərçəkmiş qismində ifadə verən Elton Əliyev deyib ki, 2007-ci ildə onu keçmiş MTN-in binasına aparıblar: "Atamdan 500 min dollar tələb etdilər. Atam da mənim azadlığa buraxılmağım üçün 350 min dollar verdi". 

    Akif Çovdarov isə zərərçəkmişin yalan danışdığını vurğulayıb. 

    Məhkəmənin növbəti iclası fevralın 13-nə təyin edilib. 

    Qeyd edək ki, A.Çovdarov 2015-ci ilin noyabr ayında həbs edilib. Həmin vaxt Səbail Rayon Məhkəməsi onun barəsində dörd ay müddətində həbs qətimkan tədbiri seçib. Sonradan həbs qətimkan tədbirinin vaxtı bir neçə dəfə uzadılıb. O, Cinayət Məcəlləsinin 145.3 (Qanunsuz azadlıqdan məhrum etmə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), 179.3.1, 179.3.2 (Mənimsəmə və ya israf etmə mütəşəkkil dəstə tərəfindən külli miqdarda törədildikdə), 181.3.1, 181.3.2 (Quldurluq mütəşəkkil dəstə tərəfindən külli miqdarda əmlak əldə etmək məqsədi ilə törədildikdə), 182.3.1, 182.3.2 (Hədə-qorxu ilə tələb etmə külli miqdarda əmlak əldə etmək məqsədi ilə törədildikdə ), 228.4 (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə), 302.1, 302.2 (Gizli qaydada informasiya alınması üçün nəzərdə tutulmuş texniki vasitələrdən istifadə edilməklə əməliyyat-axtarış fəaliyyəti haqqında qanunvericiliyi pozma), 311.3.1, 311.3.2, 311.3.3, 311.3.4 (Rüşvət alma qabaqcadan əlbir olan bir qrup şəxs və ya mütəşəkkil dəstə tərəfindən hədə-qorxu tətbiq olunmaqla külli miqdarda və təkrar törədildikdə), 313 (Vəzifə saxtakarlığı), 341.2.1, 341.2.2 və 341.2.3-cü (Bir qrup şəxs tərəfindən silah tətbiq olunmaqla hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə ağır nəticələrə səbəb olduqda) maddələri ilə ittiham olunur.

    A.Çovdarov və MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə ittiham aktı ibtidai araşdırmaya prosessual rəhbərliyi həyata keçirən Azərbaycan Respublikasının Baş prokuroru tərəfindən təsdiq edilərək sentyabrın 5-də aidiyyəti üzrə baxılması üçün məhkəməyə göndərilib.

    Xatırladaq ki, cinayət işi üzrə 320-dən çox şahid, 60-dan çox isə zərərçəkmiş var. Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslər A.Çovdarov, S.Məmmədov, A.Əliyev və O.Osmanova məxsus ümumilikdə 33 milyon 466 min manat dəyərində əmlak və pul vəsaitlərinin, o cümlədən 8 milyon 967 min manat dəyərində ticarət və xidmət sahələri, istilikxanalar, balıqçılıq təsərrüfatları və sair əmlak kompleksi, torpaq sahələri, 24 milyon 445 min manat dəyərində fərdi yaşayış evləri, mənzillər, nəqliyyat vasitələri və 37 min manat dəyərində zərgərlik məmulatlarının üzərinə həbslər qoyulub.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi