Yuxarı
    Bağlamaq

    Akif Çovdarov aclıq aksiyasını dayandırıb - YENİLƏNİB

    Həbsdə olan keçmiş MTN polkovniki Səlim Məmmədovun anası dünyasını dəyişib

    *** saat 13:48

    Bakı. 5 dekabr. REPORT.AZ/ Bu gün Sabunçu Rayon Məhkəməsinin inzibati binasında ləğv edilmiş Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi, general-mayor Akif Çovdarov, MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə məhkəmə iclası davam etdirilib.

    "Report"un məlumatına görə, Bakı Hərbi Məhkəməsinin sədri Həbib Həsənovun sədrliyi ilə qapalı keçirilən prosesdə Səlim Məmmədovun vəkili Cavid Rzazadə vəsatətlə çıxış edib.

    O, müvəkkilinin anasının dünyasını dəyişdiyini bildirib: "Buna görə hüquqlarını müdafiə etdiyim şəxsə yas mərasimində iştirak etmək üçün şərait yaradılsın".

    Məhkəmə vəsatəti təmin etməyib.

    Zərərçəkmiş Şahmar Qurbanovun keçmiş həyat yoldaşı Nigar Məmmədovanın istintaqa əvvəl verdiyi ifadəsi elan olunub.

    Sonra N.Məmmədova şahid qismində ifadə verib. O, əvvəllər A.Çovdarovun adını eşitmədiyini deyib: "İstintaqa nə ifadə vermişəmsə, hamısı Şahmar Qurbanovun mənə dedikləridir. Həqiqətən Şahmar iki ev, bir sex və bir neçə maşınımızı satdı. Onun İsgəndər Hüseynovla birgə xaricə gedib Akif Çovdarov və Eldar Mahmudova brilliant gətirməsindən xəbərdaram. Bu barədə Şahmar mənə bildirib".

    Zərərçəkmiş Ş.Qurbanov istintaqda dindirilərkən ümumilikdə A.Çovdarova 380 min dollar dəyərində brilliant və 500 min dollar pul verdiyini bildirib.

    Günün ikinici yarısında davam etdirilən prosesdə A.Çovdarovun barəsində ekspertizanın keçirilməsi müzakirə olunub.

    Vəkil S.Rəsulov "Report"a bildirib ki, onlar yenidən ekspertizanın təyin edilməsini istəyib. Onun sözlərinə görə, ötən məhkəmə iclasında qaldırdıqları vəsatətə ekspertiza rəy verib: "Rəyə əsasən, Akif Çovdarovun səhhəti ilə bağlı ekspertizanın keçirilməsi mümkün deyil. Müvəkkilim 40 gündən artıqdır ki, aclıq aksiyası keçirir. Həkimlər bildiriblər ki, ekspertiza aparmaq üçün onun orqanizimi normal olmalıdır. Buna görə məhkəmə 15 gün vaxt verib. Bu müddət ərzində - Akif Çovdarovun səhhəti yaxşılaşandan sonra tibbi ekspertiza aparılacaq".

    S.Rəsulov A.Çovdarovun aclıq aksiyasını dayandırdığını bildirib: "Bu barədə Bakı İstintaq Təcridxanasına da rəsmi müraciət göndəriləcək".

    Proses dekabrın 19-na qədər təxirə salınıb.

    Qeyd edək ki, A.Çovdarov ötən ilin noyabr ayında həbs edilib. Həmin vaxt Səbail Rayon Məhkəməsi onun barəsində dörd ay müddətində həbs qətimkan tədbiri seçib. Sonradan həbs qətimkan tədbirinin vaxtı bir neçə dəfə uzadılıb. O, Cinayət Məcəlləsinin 145.3 (Qanunsuz azadlıqdan məhrum etmə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), 179.3.1, 179.3.2 (Mənimsəmə və ya israf etmə mütəşəkkil dəstə tərəfindən külli miqdarda törədildikdə), 181.3.1, 181.3.2 (Quldurluq mütəşəkkil dəstə tərəfindən külli miqdarda əmlak əldə etmək məqsədi ilə törədildikdə), 182.3.1, 182.3.2 (Hədə-qorxu ilə tələb etmə külli miqdarda əmlak əldə etmək məqsədi ilə törədildikdə ), 228.4 (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə), 302.1, 302.2 (Gizli qaydada informasiya alınması üçün nəzərdə tutulmuş texniki vasitələrdən istifadə edilməklə əməliyyat-axtarış fəaliyyəti haqqında qanunvericiliyi pozma), 311.3.1, 311.3.2, 311.3.3, 311.3.4 (Rüşvət alma qabaqcadan əlbir olan bir qrup şəxs və ya mütəşəkkil dəstə tərəfindən hədə-qorxu tətbiq olunmaqla külli miqdarda və təkrar törədildikdə), 313 (Vəzifə saxtakarlığı), 341.2.1, 341.2.2 və 341.2.3-cü (Bir qrup şəxs tərəfindən silah tətbiq olunmaqla hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə ağır nəticələrə səbəb olduqda) maddələri ilə ittiham olunur.

    A.Çovdarov və MTN-in Energetika və Nəqliyyat Sahələrində Təhlükəsizlik Baş İdarəsinin sabiq işçisi, polkovnik Səlim Məmmədov, MTN-in sabiq idarə rəisi, mayor Akif Əliyev və keçmiş şöbə rəisi Orxan Osmanovun cinayət işi üzrə ittiham aktı ibtidai araşdırmaya prosessual rəhbərliyi həyata keçirən Azərbaycan Respublikasının Baş prokuroru tərəfindən təsdiq edilərək sentyabrın 5-də aidiyyəti üzrə baxılması üçün məhkəməyə göndərilib.

    Xatırladaq ki, cinayət işi üzrə 320-dən çox şahid, 60-dan çox isə zərərçəkmiş var. Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslər A.Çovdarov, S.Məmmədov, A.Əliyev və O.Osmanova məxsus ümumilikdə 33 milyon 466 min manat dəyərində əmlak və pul vəsaitlərinin, o cümlədən 8 milyon 967 min manat dəyərində ticarət və xidmət sahələri, istilikxanalar, balıqçılıq təsərrüfatları və sair əmlak kompleksi, torpaq sahələri, 24 milyon 445 min manat dəyərində fərdi yaşayış evləri, mənzillər, nəqliyyat vasitələri və 37 min manat dəyərində zərgərlik məmulatlarının üzərinə həbslər qoyulub.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi