Abşeronda yolu keçmək istəyən piyadanı avtomobil vurub

Abşeron. 23 fevral. REPORT.AZ/ Abşeron rayonunda yolu keçmək istəyən piyadanı avtomobil vurub.

"Report"un yerli bürosunun verdiyi məlumata görə, hadisə rayonun Ceyranbatan qəsəbəsində baş verib.

Belə ki, qəsəbə sakini, 1977-ci il təvəllüdlü Bəhruz Sədrəddin oğlu Quliyev yolu keçmək istəyərkən qarşı tərəfdən gələn avtomobil tərəfindən vurulub. Daha sonra avtomobil piyadan üstündən keçib.

Yaralı dərhal Sumqayıt şəhər Təcili Tibbi Yardım Xəstəxanasına çatdırılıb. Xəstəxanadan verilən məlumata görə, yaralının vəziyyəti ağırdır.

Faktla bağlı araşdırma aparılır.