Azərbaycan millisinin futbolçusu Almaniyada mövsümün ən yaxşı transferlərinin “onluğ”una düşüb

Bakı. 16 yanvar. REPORT.AZ/ Azərbaycan milli komandasının futbolçusu Rüfət Dadaşov Almaniyanın III liqasında cari mövsümün ən yaxşı transferlərinin “onluğ”una düşüb.

“Report” xəbər verir ki, bu, “liga3-online” portalının apardığı araşdırma nəticəsində müəyyənləşib. Ötən yay Regional Liqanın Şimal-Şərq zonasında çıxış edən Berlin “Dinamo”sundan “Proyssen”ə keçən Dadaşov yeni komandasında özünü doğruldub. Cari çempionatda 17 oyuna 7 qol vuran 28 yaşlı hücumçu mövsümün 7-ci ən yaxşı transferi kimi dəyərləndirilib.

Qeyd edək ki, Rüfət Dadaşov ötən mövsüm 26 qolla Regional Liqanın bombardiri olub.