Bakı. 26 sentyabr. REPORT.AZ/ "Qarabağ"ın futbolçusu İnnosent Emeqara "Zirə"ni 3:2 hesabı ilə məğlub etdikləri Azərbaycan Premyer Liqasının I turundan təxirə salınmış oyunun ardından brifinq keçirib. Komandasının iki qolunun müəllifi olan isveçrəli hücumçu "Report"un da suallarını cavablandırıb:
- Bugünkü qarşılaşmanı necə dəyərləndirirsiniz?
- Bütün oyunlarda qalib gəlməyə çalışırıq. Hücumçuyamsa, işim qol vurmaqdır. Mən də buna çalışmalıyam. "Qəbələ" ilə oyuna nəzərən, bu gün daha ağır oyun oldu. "Zirə" bizə çətin anlar yaşatdı.
- Bugünkü qolların davamını "Arsenal"la görüşdə görə biləcəyik?
- Təbii ki, istərdim. Düzdür, motivasiya fərqi də var. Daha yaxşı çıxış etməyə məcburuq.
- "Qarabağ"a əsas rəqib kimi hansı komandanı görürsünüz?
- Fikrimcə, bu, "Neftçi"dir. "Ağ-qaralar" bizimlə eyni xala malikdirlər. Amma proqramımız daha çətindir. "Neftçi" ağır təqvimimizdən yararlanmağa çalışacaq.
- Bəs "Qəbələ"ni siyahıdan "silirsiniz"?
- Məncə, əsas rəqib "Neftçi"dir.