Yuxarı

Klublar Azərbaycan Kubokunun finalının Naxçıvanda işıqlandırma olmayan stadionda keçirilməsindən narahatdır

Klublar Azərbaycan Kubokunun finalının Naxçıvanda işıqlandırma olmayan stadionda keçirilməsindən narahatdır

AFFA Klublar Komitəsinin bugünkü iclasında ilk olaraq, 2019-2020 mövsümündə Azərbaycan Premyer Liqasında gənc futbolçular üçün limit məsələsi müzakirə edilib.

"Report"un məlumatına görə, bu barədə komitə sədri Riad Rəfiyev toplantıdan sonra keçirdiyi brifinqdə deyib. O bildirib ki, müzakirələrə Peşəkar Futbol Liqası rəsmiləri və Azərbaycanın 21 yaşadək futbolçulardan ibarət milli komandasının baş məşqçisi Milan Obradoviç də qatılıb. İclasda həm klublar, həm də Obradoviçin fikirlərinin dinlənilib. Serbiyalı mütəxəssis 1998-1999 təvəllüdlü iki futbolçunun start heyətdə yer almasını təklif edib. Klublar isə buna fərqli yanaşıblar. Yəni, bununla razılaşanlar da, razılaşmayanlar da olub.

Rəfiyev gündəlikdəki daha bir məsələnin oyunların vaxtı ilə əlaqədar olduğunu diqqətə çatdırıb: "Artıq havalar istiləşməyə doğru gedir. Aprelin 13-də "Zirə" - "Sumqayıt" matçı saat 16:00-da başladı. Azərbaycan Kubokunda bu iki komanda arasındakı ilk yarımfinal görüşü isə saat 16:30-da start götürəcək. Fikrimizcə, artıq oyunların saatlarını dəyişsək və bir qədər gec saatlara təyin etsək, daha yaxşı olar".

Komitə sədri Azərbaycan Kubokunun final matçının süni işıqlandırma sistemi olmayan stadionda təşkilindən narahatlıq ifadə etdiklərini də vurğulayıb: "Əslində finalın regionda keçirilməsi gözəl fikirdir. Biz də bu ideyanı dəstəkləyirik. Sadəcə, bəzi nüanslar var ki, onunla əlaqədar müzakirə aparılır. Məsələn, Azərbaycan Kubokunun finalının Naxçıvanda keçiriləcəyi deyilir. Amma oradakı stadionda süni işıqlandırma yoxdur. Mayın 19-da havalar isti olacaq. Bununla əlaqədar hansı tədbirlər görüləcək? Belə məsələlər müzakirə olundu. Növbəti iclas mayın 14-nə təyin olunub. Ümidvarıq ki, hansısa dəyişiklik olsa, o vaxtadək bizə Peşəkar Futbol Liqasından xəbər gələcək".

Rəfiyev toplantıda İntizam Kodeksindəki bəzi maddələrə yenidən baxılmasının təklif olunduğunu da diqqətə çatdırıb: "Orada belə bir maddə var ki, hansısa futbolçu qırmızı vərəqə alsa, cərimə 2-dən 6 oyuna qədərdir. Eyni epizoda görə qırmızı vərəqə alan futbolçulardan birinə 2, digərinə 3 oyunluq cəza verilir. Demirik ki, burada kimsə bilərəkdən nəsə edir. Səbəb odur ki, həmin maddədə cəzanın 2 oyundan 6 oyuna qədər verilməli olduğu göstərilib. Biz də istəyirik ki, həmin maddə dəqiqləşdirilsin".

Nəhayət, UEFA-nın uşaq futbolu üçün klublara ayırdığı vəsaitin hara xərclənməsi də müzakirə olunub. Rəfiyevin sözlərinə görə, klublar gələn ay AFFA-ya bununla bağlı hesabatlarını təqdim etməlidirlər.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Son xəbərlər



Orphus sistemi