Kamran Ağayev və Emin Mahmudov "Boavişta"nın oyununda ehtiyatda qalıblar

Bakı. 13 fevral. REPORT.AZ/ "Boavişta" klubu Portuqaliya çempionatının XXI tur matçında "Braqa"nı qəbul edib.

"Report"un məlumatına görə, meydan sahiblərinin heyətində yer alan Azərbaycan milli komandasının oyunçuları Kamran Ağayevlə Emin Mahmudov ehtiyatda qalıblar.

K. Ağayevin 3 oyunluq cəzasının artıq başa çatmasına baxmayaraq, o və E. Mahmudov ehtiyat oyunçular skamyasında yer alıb. Emindən fərqli olaraq Kamran "Boavişta"da ilk dəfə ehtiyatda olub. Baş məşqçi Migel Leal start heyətdə Vaqnerə şans verib.

Oyun isə 1:1 hesablı bərabərliklə nəticələnib. Meydan sahibləri buraxdıqları erkən qola fasiləyədək cavab verə biliblər.

21 oyundan sonra "Boavişta" 26 xalla 11-ci pillədə qərarlaşıb.

Xatırladaq ki, Kamran Ağayev "Benfika" ilə XVII tur qarşılaşmasında rəqib futbolçularla insidentə görə Portuqaliya Futbol Federasiyasının Nizam-İntizam Komitəsi tərəfindən 3 oyunluq cəzalandırılıb.