Yuxarı

Çempionlar Liqasında 1/8 final mərhələsinin daha 2 oyunu keçiriləcək

Əsas diqqətlər Roma ilə İspaniya Real Madridinin oyununa yönələcək

Bakı. 17 fevral. REPORT.AZ/ Bu gün futbol üzrə Çempionlar Liqasında 1/8 final mərhələsinin daha 2 oyunu keçiriləcək. "Report"un məlumatına görə, əsas diqqətlər İtaliya paytaxtında "Roma" ilə İspaniya "Real Madrid"inin oyununa yönələcək.

Bu matça hər iki komanda mövsümün ilk yarısı ilə müqayisədə yeni baş məşqçinin rəhbərliyi altında çıxacaq. Zinəddin Zidan Çempionlar Liqasında baş məşqçi kimi debüt edəcək. O, əvvəllər futbolçu kimi şərəfini qoruduğu "kral klubu"nun sükanı arxasında olacaq. Luçano Spaletti isə bir neçə ildən sonra yenidən "canavarlar"ı vacib oyuna çıxaracaq.

"Roma" son 13 matçda bütün cəbhələrdə yalnız bir dəfə uduzub. "Real madrid" isə son 8 iki oyunluq qarşıdurmalarda İtaliya təmsilçilərinə yenilib.

Digər qarşılaşma isə Belçikada "Gent"lə "canavarlar" ləqəbli daha bir komanda Almaniya "Volfsburq"u arasında olacaq. Hər iki komanda Çempionlar Liqasının "pley-off" mərhələsində debüt edəcək. "Gent" son 7 ev oyunundan qalib ayrılıb. Əvəzində "Volfsburq" qrup mərhələsi başa çatdıqdan sonra cəmi 1 dəfə qələbəyə sevinib. Komandanın ən yaxşı futbolçularından sayılan Naldo ilk oyunu cəza üzündən buraxmalı olacaq. Üstəlik, əsas qapıçı Dieqo Benalyonun zədəli olması səbəbindən Kun Kasteels Çempionlar Liqasında debüt etməyə hazırlaşır.

Çempionlar Liqası, 1/8 final

23:45. "Roma" (İtaliya) - "Real Madrid" (İspaniya)

Roma, "Olimpiko" stadionu

23:45. "Gent" (Belçika) - "Volfsburq" (Almaniya)

Gent, KAA Gent stadionu.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi