Yuxarı
    Bağlamaq

    Azərbaycan Kubokunun finalı Respublika stadionunda keçirilməyəcək

    Apreldən stadionda Avropa Oyunlarına hazırlıq işlərinə başlanılacaq

    Bakı. 3 mart. REPORT.AZ/ İyunun 3-də keçiriləcək futbol üzrə Azərbaycan Kubokunun final matçı Tofiq Bəhramov adına Respublika stadionunda təşkil olunmayacaq. Bu barədə "Report"a mərkəzi arenanın direktoru Akif İsmayılov məlumat verib.

    A.İsmayılovun sözlərinə görə, apreldən stadionda "Bakı 2015" I Avropa Oyunlarına hazırlıq işlərinə başlanılacaq. Arena kamandan oxatma yarışları üçün hazırlanacaq. Görüləcək işlərin qaçış cığırlarını əhatə edəcəyini deyən direktor ot örtüyünə hər hansı təsirin olmaması üçün çalışacaqlarını bildirib: "Stadionumuzda paralel olaraq, futbol matçları da keçiriləcək. Amma ölkə kubokunun final qarşılaşması Avropa Oyunları ərəfəsinə təsadüf edəcəyindən, görüşün bizim arenada təşkili mümkün olmayacaq".

    Qeyd edək ki, I Avropa Oyunları iyunun 12-də start götürəcək. Kamandan oxatma yarışları isə 16 - 22 iyunu əhatə edəcək. Azərbaycan Kubokunun final qarşılaşmaları əksərən Tofiq Bəhramov adına Respublika stadionunda keçirilib. Son 9 il ərzində yalnız bir dəfə - 2011-2012-ci il mövsümündə kubokun həlledici matçı başqa meydanda - "Dalğa Arena"da təşkil olunub. 

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi