XXI əsrdə ən çox qol vuran müdafiəçi açıqlandı

Beynəlxalq Futbol Tarixi və Statistikaları Federasiyası (IFFHS) XXI əsrdə ən çox qol vuran müdafiəçilərin adlarını açıqlayıb.

"Report" xəbər verir ki, siyahıya İspaniya millisinin və "Real Madrid" klubunun kapitanı Serxio Ramos başçılıq edir.

35 yaşlı təcrübəli müdafiəçi XXI əsrdə 126 dəfə fərqlənib. İkinci sırada 104 qolla Yaponiya yığmasının sabiq üzvü Markus Tulio Tanaka qərarlaşıb. XXI əsrdə yalnız bu iki müdafiəçi 100-dən çox qol vura bilib.

IFFHS-in araşdırmasına əsasən, 51 müdafiəçi 50 və daha çox qol vurmağı bacarıb.

Qeyd edək ki, Serxio Ramos 2005-ci ildən "Real Madrid"də çıxış edir. Onun Madrid təmsilçisi ilə müqaviləsi yayda başa çatacaq.