İngiltərədə bəzi futbol klublarının uşaqlardan pul alması etiraza səbəb olub

Bakı. 3 yanvar. REPORT.AZ/ İngiltərə Premyer Liqasında çıxış edən bəzi klubların matçlar zamanı futbolçularla birgə meydana çıxan uşaqlardan pul alması etiraza səbəb olub.

“Report” BBC-yə istinadən xəbər verir ki, İngiltərə yığmasının sabiq futbolçusu, hazırda şərhçi kimi fəaliyyət göstərən Hari Lineker bunu “acgözlük” adlandırıb. Onun sözlərinə görə, bu, əxlaqi baxımdan düzgün olmayan anlamsız bir yanaşmadır.

Hazırda Premyer Liqada çıxış edən klublardan bir nəfər üçün ən çox ödəniş istəyən klub “Everton”dur. Liverpul təmsilçisi bunun üçün 718 funt sterlinq alır. Digərlərinə gəlincə, “Vest Hem” 700, “Lester” 600, “Tottenhem” 405, “Vulverhempton” 395, “Kristal Pelas” 375, “Brayton” 350, “Börnli” 300, “Kariff Siti” 255, “Uotford” 250, “Bornmut” isə 185 funt sterlinq qiymət qoyub.

Sözügedən 11 klub əldə edilən vəsaiti xeyriyyəçiliyə sərf edir. “Arsenal”, “Mançester Yunayted”, “Mançester Siti”, “Çelsi” kimi klublar isə bunun üçün heç bir ödəniş tələb etmir. Adətən, futboçularla klubların aşağı yaş qrupları üzrə komandalarının üzvləri və sponsorların müəyyənləşdirdiyi uşaqlar meydana çıxır.

Qeyd edək ki, Azərbaycan Premyer Liqasında futbolçular matçlar zamanı nadir hallarda, xüsusi aksiyalar çərçivəsində uşaqlarla meydana çıxırlar. Lakin avrokubok və Azərbaycan millisinin ev oyunlarında azyaşlıları da meydanda görmək mümkündür.