"Traktorsazi" Səudiyyə Ərəbistanı komandası ilə oyunlarını neytral meydanlarda keçirəcək

Bakı. 16 mart. REPORT.AZ/ Səudiyyə Ərəbistanı və İranın futbol komandaları Asiya Çempionlar Liqasındakı oyunlarını neytral meydanlarda keçirəcəklər. "Report"un məlumatına görə, səbəb kimi iki ölkə arasındakı münasibətlərin yaxşılaşmaması göstərilib.

Bu isə o deməkdir ki, C qrupunda yer alan Cənubi Azərbaycanın "Traktorsazi" klubu aprelin 6-da "Əl Hilal"ı Təbrizdə qəbul edə bilməyəcək. Eyni zamanda aprelin 19-da nəzərdə tutulan təkrar qarşılaşma Səudiyyə Ərəbistanında təşkil olunmayacaq. 3 turdan sonra "Traktorsazi" 6 xalla qrup lideri, "Əl Hilal" isə 5 xalla qrup ikincisidir.

Qeyd edək ki, İranla Səudiyyə Ərəbistanı arasındakı münasibətlər 47 nəfərin, o cümlədən, din xadimi Nimr ən-Nimrin Ər Riyadda edam olunmasından sonra gərginləşib. Buna etiraz edən iranlılar Səudiyyə Ərəbistanının Tehrandakı səfirliyinin binasına hücum edərək, bir neçə otağı darmadağın ediblər. Nəticədə Səudiyyə Ərəbistanı İranla diplomatik münasibətlərini kəsib.