“Şimal”ın prezidenti: UEFA Regionlar Kubokunda uğurlu nəticəyə imza atmağa çalışacağıq

Bura 18 nəfərlik heyətlə gəlmişik, maksimum şəkildə uğurlu nəticəyə imza atmağa çalışacağıq.

Bunu “Report”a açıqlamasında Azərbaycanı UEFA Regionlar Kubokunda təmsil edən “Şimal” klubunun prezidenti Qılman ibrahimov bu gün keçirəcəkləri ilk matçdan öncə deyib.

Klub rəsmisi heyətlə bağlı problemlərə baxmayaraq, AFFA Region Liqasının çempionu kimi qatıldıqları yarışda uğurlu çıxış etmək istədiklərini bildirib:

“Bir neçə saatdan sonra meydana çıxacağıq. Yarışa Region Liqasının qalibi kimi qatılmışıq. Diqqətimizi əsasən növbəti mövsümdən çıxış edəcəyimiz Azərbaycan II Liqasına yönəltmişik. Rəqibimizlə bağlı kifayət qədər informasiyamız yoxdur. Çünki həvəskar futbol media tərəfindən işıqlandırılmır. Meydana çıxıb, qələbə qazanmağa çalışacağıq. Baxmayaraq ki, böyük problemlərimiz var. Çempion heyətin 7 əsas üzvü bu yarışda olmayacaq. UEFA-nın qaydalarına görə həvəskar futbolda iştirak edən oyunçuların heç bir peşəkar klubla müqaviləsi olmamalıdır. Bizim futbolçuların da vaxtilə klublarla peşəkar müqaviləsi olub. Bu səbəbdən UEFA onların yarışda iştirakına icazə vermir”.

Qeyd edək ki, UEFA Regionlar Kubokunda B qrupunda mübarizə aparan “Şimal” klubu ilk matçını Kutaisi Futbol Akademiyasının meydanında yerli “Football School Bridge”yə qarşı keçirəcək. Qarşılaşma Bakı vaxtı ilə saat 19:00-da başlayacaq. Komanda qrupda ikinci matçını iyulun 1-də, Bakı vaxtı ilə saat 19:00-da İsveçin “Qothenburq” kollektivinə qarşı keçirəcək.