"Real Madrid" kapitanı ilə müqaviləni uzadır

İspaniya "Real Madrid"inin futbolçusu Serxio Ramos klubla müqaviləsini uzadacaq.

"Report"un "El Espanol"a istinadən məlumatına görə, 34 yaşlı müdafiəçi yayda bitəcək sözləşməsini 2023-cü ilədək yeniləyəcək. Onun illik əmək haqqı koronavirusla əlaqədar itkilər üzündən 10 faiz azaldılmaqla, 12 milyon avro təşkil edəcək. Daha əvvəl yerli mətbuat tərəflərin razılığa gələ bilmədiklərini və təcrübəli oyunçunun klubu tərk etməsinin mümkünlüyünü yazıb.

Qeyd edək ki, Serxio Ramos "Real Madrid"də 2005-ci ildən forma geyinir. O, 5 qat İspaniya çempionluğu, 2 dəfə ölkə kuboku, 4 dəfə İspaniya Super Kuboku, 4 dəfə Çempionlar Liqası və klublararası dünya çempionluğu, habelə 3 dəfə UEFA Super Kuboku əldə edib. Ramos bu mövsüm müxtəlif turnirlərdə 18 oyuna 3 qol və 1 məhsuldar ötürmə müəllifi olub.