Qurban Qurbanov: "Bu rəqibə qarşı bütün komponentlərdə diqqətli olmalıyıq"

Qurban Qurbanov: "Bu rəqibə qarşı bütün komponentlərdə diqqətli olmalıyıq" "Çox vacib oyuna çıxaracağıq. Rəqibin açıqlamalarında görünür ki, inamlıdırlar. Qələbəyə ümid edirlər. Bu, onların özlərinə inamından irəli gəlir. Biz də istəkliyik. İlk matç Bakıda keçirilsə də, hər şey cavab oyununda həll olunacaq".
Futbol
604
18 Avqust , 2021 18:21
Qurban Qurbanov: Bu rəqibə qarşı bütün komponentlərdə diqqətli olmalıyıq
Qurban Qurbanov

"Çox vacib oyuna çıxaracağıq. Rəqibin açıqlamalarından görünür ki, inamlıdırlar, qələbəyə ümid edirlər. Bu, onların özlərinə inamından irəli gəlir. Biz də istəkliyik. İlk matç Bakıda keçirilsə də, hər şey cavab oyununda həll olunacaq".

Report"un məlumatına görə, bu fikirləri "Qarabağ"ın baş məşqçisi Qurban Qurbanov Şotlandiyanın "Aberdin" klubuna qarşı keçirəcəkləri UEFA Konfrans Liqasının pley-off mərhələsinin ilk oyunundan əvvəl mətbuat konfransında deyib.

49 yaşlı mütəxəssis rəqibə imkan verməməyə çalışacaqlarını bildirib: "Futbolçular "Aberdin"i yaxından tanıyırlar. Onlar son zamanlar daha çox istəklidirlər. Sabah meydanda mübarizə həddindən artıq çox olacaq, nəinki baxımlı oyun. Rəqibə boşluqlar verməməyə çalışacağıq".

Təcrübəli baş məşqçi "Aberdin"in fiziki göstəricilərdə və standart vəziyyətlərdə çox yaxşı olduğunu söyləyib: "Topla davranmağı xoşlayır və rahat qol vurmağı bacarırlar. Heç nədən qol epizodu yaradıb fərqlənə də bilirlər. Bütün komponentlərdə diqqətli olmalıyıq. İnanıram ki, sabah bunu bacaracağıq".

Qurbanov Tofiq Bəhramov adına Respublika stadionunun ot örtüyünün yaxşı olmadığını xatırladıb: "Sabah ot örtüyü əvvəlkindən yaxşı olmayacaq. Çünki cəmi bir həftə keçib. Biz də çox istərdik ki, yaxşı meydanda oynayaq. Topla davranmaqda çətinlik çəkəcəyik. Amma rəqib hava mübarizələrində yaxşıdır. Bunun qarşısını almağa çalışacağıq".

Mütəxəssis "Aberdin"in hansı sistemlə oynayacağını bilmədiyini sözlərinə əlavə edib: "Aşağı-yuxarı hansı sistemlə oynasa, meydanda 11 nəfərə qarşı eyni sayda oyunçu ilə çıxış edirsən. Eyni sistemdə oynayan komanda ilə 3-4 matç keçirsən, get-gedə oynamaq daha rahat olur. Ümid edirəm ki, sabah daha çox hücum edən tərəf olmağa çalışacağıq".

Baş məşqçinin sözlərinə görə, əvvəlki mərhələlərdə üz-üzə gəldikləri rəqiblərlə "Aberdin"i müqayisə etmək düzgün çıxmaz: "Amma hər biri ilə matçlarda çətinliklərimiz olub. Müqayisə etmək çətindir, hamısı ciddi rəqib idi. Hərəsinin öz oyun fəlsəfəsi var. Onlara qarşı düzgün hazırlaşdıq. Ola bilər ki, “Aberdin” bir az üstündür. Amma o birilərini də zəif saymıram".

Qurbanov əvvəlki qarşılaşmalarda çox qol vurmaq istərdiklərini deyib: "Biz azarkeş üçün oynayırıq. Azarkeş qələbə ilə yanaşı, qollardan da həzz alır. Qarşımızda duran rəqib də boşluq vermir ki, istədiyimiz qədər qol vuraq. Bütün rəqiblər bizə həddən artıq ciddi yanaşır. Bu, bir tərəfdən, bizi sevindirsə də, eyni zamanda işimizi çətinləşdirir. Əvvəllər bizi çox ciddiyə almırdılar, bu da meydanda işimizi asanlaşdırırdı. Çoxlu qol vurmağı özüm də xoşlayıram. Futbolçularımın daha yaxşı performans sərgiləməsini və daha çox fərqlənmələrini istərdim. Ancaq belə turnirlərdə qol buraxmamaq da çox vacibdir. Bu səbəbdən, həm hücumda, həm də müdafiədə oynamaq önəmlidir. Heç vaxt söz verməmişəm ki, mütləq qalib gələcəyəm. Həmişə söz vermişəm ki, komandam yaxşı mübarizə aparacaq. Qalibiyyət üçün ən yaxşısını etməyə çalışacağıq. Mən də futbolçularıma güvənərək deyirəm ki, sabah azarkeşlər oyundan razı qalacaqlar".

O, hücumçu axtarışlarının davam etdiyini də diqqətə çatdırıb: "Çox axtarırıq, danışıqlar gedir. Tezliklə müsbət də ola bilər. Konkret cavab gözlədiyimiz bir neçə oyunçu var. Bu, təkcə hücum yox, müdafiə və yarımmüdafiə mövqeyinə də aiddir. Bəzən düşünmədiyimiz elementlər ortaya çıxır, danışıqlar yarımçıq qalır".

Qeyd edək ki, avqustun 19-da Tofiq Bəhramov adına Respublika stadionunda keçiriləcək "Qarabağ" - "Aberdin" oyunu saat 20:00-da start götürəcək. Cavab qarşılaşması bir həftə sonra Şotlandiyada baş tutacaq.

Son xəbərlər

Orphus sistemi