"Qarabağ" evdə 50-ci və 10 oyundan sonra ilk dəfə uduzdu

"Qarabağ" evdə 50-ci və 10 oyundan sonra ilk dəfə uduzdu “Qarabağ” klubu Azərbaycan çempionatlarında 50-ci ev məğlubiyyətini alıb.
Futbol
440
21 Sentyabr , 2020 11:14
Qarabağ evdə 50-ci və 10 oyundan sonra ilk dəfə uduzdu

“Qarabağ” klubu Azərbaycan çempionatlarında 50-ci ev məğlubiyyətini alıb.

"Report"un Peşəkar Futbol Liqasının rəsmi saytına istinadən məlumatına görə, bu, Premyer Liqada III turun “Neftçi” ilə matçına təsadüf edib. Ağdamlılar ev oyununda 1:2 hesabı ilə uduzub.

Bu qarşılaşmayadək öz meydanında keçirdiyi 393 görüşdə 49 dəfə xalsız qalan “Qarabağ” yubiley məğlubiyyətinə üzülüb. Bununla həm də Ağdam təmsilçisinin 10 matçdan ibarət məğlubiyyətsiz oyunlar seriyası qırılıb. Qurban Qurbanovun baş məşqçi olduğu kollektiv sonuncu dəfə ötən il noyabrın 22-də “Sumqayıt”la səfər qarşılaşmasında uduzub – 1:2.

Son çempion dekabrın 6-dan sonra ilk dəfə qol buraxıb. Ağdamlılar “Keşlə” ilə (2:2) matçdan sonra ardıcıl 8 quru oyun keçirib.

“Qarabağ”ın həm də evdəki məğlubiyyətsizliyi sona çatıb. “Səbail”lə qarşılaşmadakı texniki nəticəni nəzərə almasaq, ağdamlılar öz meydanındakı ardıcıl 24 matçda uduzmamışdı. Bu klub sonuncu dəfə 868 gün öncə - 2018-ci il mayın 6-da “Neftçi”yə 0:1 hesabı ilə yenilib.

Digər tərəfdən, "Qarabağ"la səfər oyunu “Neftçi”nin qapıçısı Aqil Məmmədov üçün yubileylə əlamətdar olub.

Bu görüş qolkiperin Premyer Liqada “ağ-qaralar”ın heyətində keçirdiyi 50-ci oyun kimi yadda qalıb. O, 2015-2016-ci illərdə də şərəfini qoruduğu paytaxt təmsilçisinə 2019-cu ildə qayıdıb. Məmmədov bu müddətdə keçirdiyi 50 görüşdə 57 top buraxıb.

Qeyd edək ki, Aqil Məmmədov Azərbaycan çempionatlarında “Neftçi”də 50 və daha çox oyun keçirən 7-ci qapıçıdır.

Son xəbərlər

Orphus sistemi