Premyer Liqa: “Kəpəz” “Araz-Naxçıvan”a qalib gəlib

Azərbaycan Premyer Liqasında XXIX tura start verilib.

“Report”un məlumatına görə, açılış oyunu “Liv Bona Dea Arena”da keçirilib.

Günün yeganə matçında “Araz-Naxçıvan” “Kəpəz”i qəbul edib. Görüşdə hesabı ev sahibləri açıblar. 16-cı dəqiqədə Miço Kuzmanoviç fərqlənib. Lakin fasilədən sonra gəncəlilər geridönüş etməyi bacarıblar. Əvvəlcə 54-cü dəqiqədə Martins Junior adını tabloya yazdırıb. 8 dəqiqə sonra isə Mate Kvirkviya adını tabloya yazdırıb.

Beləliklə, səfərdə 2:1 hesablı qələbə qazanan “Kəpəz” elitada qalmaq yolunda daha bir önəmli addım atıb. Gəncəlilər xallarının sayını 30-a çatdıraraq, 9-cu pillədəki mövqelərini qoruyublar. “Araz-Naxçıvan” isə 32 xalla 8-ci yerdə qalıb.

Qeyd edək ki, turun digər oyunları aprelin 6-7-də keçiriləcək.