Luis Suares Devid Bekhemin klubuna keçə bilər

İspaniyanın "Atletiko" (Madrid) klubunun futbolçusu Luis Suares karyerasını ABŞ-da davam etdirə bilər.

"Report" xəbər verir ki, bu barədə tanınmış jurnalist Nikolo Skira özünün şəxsi tviter hesabında məlumat verib.

O bildirib ki, 35 yaşlı hücumçu ilə MLS təmsilçisi "İnter Mayami" maraqlanır. Madrid klubu isə uruqvalı forvardın müqaviləsini yeniləmək niyyətində deyil.

Qeyd edək ki, Luis Suares 2020-ci ildə "Atletiko"ya "Barselona"dan keçib. Hücumçu cari mövsüm La Liqada 29 matçda iştirak edib, 11 qol və 2 məhsuldar ötürmə ilə yadda qalıb. Onun sözləşməsi mövsümün sonunda başa çatacaq.

"İnter Mayami" İngiltərə millisinin və "Mançester Yunayted"in sabiq futbolçusu Devid Bekhemə məxsusdur.