Koronavirusa yoluxmada artım Azərbaycan Premyer Liqasına təsir edə bilər

“Püşkatmadan əvvəl AFFA prezidenti Rövnəq Abdullayev soruşdu ki, “Qarabağ”ın Çempionlar Liqası oyunundan sonra sırf o matçla bağlı koronavirusa yoluxma sayında artım olubmu? Bunun özü xəbərdarlıqdır”.

"Report"un məlumatına görə, bunu Peşəkar Futbol Liqasının (PFL) prezidenti Ramin Musayev Azərbaycan Premyer Liqasının 2022/23 mövsümünün püşkatma mərasimində deyib.

Musayev bildirib ki, yoluxmanın artması futbola da təsir edə bilər. “Koronavirusla bağlı böhran yaransa, buna hazırıq. Bu baxımdan, artıq təcrübəmiz var. Gündən-günə yoluxma sayı artır. İyulun 19-da “Qarabağ”ın avrokubok matçı var. Operativ Qərargah nə qərar versə, ona əməl etmək bizim borcumuzdur”.