DÇ-2022: Qətərdə sonuncu stadionun inşası başa çatıb

2022-ci ildə Qətərdə keçiriləcək futbol üzrə dünya çempionatı üçün sonuncu - 7-ci stadionun inşası başa çatıb.

"Report"un məlumatına görə, bu barədə mundialın təşkilat komitəsinin baş katibi Həsən əl-Tavadi "Goal" nəşrinə açıqlamasında deyib.

O, "974" adı verilən arenada tikinti işlərinin tamamlanmasını elan etməkdən qürur duyduğunu bildirib: "Bu dünya çempionatına gedən yolda daha bir mərhələdir. Biz ölkəmizdə təşkil olunacaq ilk mundiala ev sahibliyi etməyə yaxınlaşırıq".

Daha əvvəl "Ras-Abu-Abud" adlanan stadion 40 000 azarkeş tutumuna malikdir. Bu arenada dünya çempionatının 7 oyunu, həmçinin Ərəb Ölkələri Kubokunun 6 görüşünün keçirilməsi planlaşdırılır.

Qeyd edək ki, DÇ-2022 21 noyabr - 18 dekabrda 32 ölkənin iştirakı ilə baş tutacaq.