Dağıstanda keçirilən turnirdə ən yaxşı futbolçuya Anatoli Banişevski mükafatı təqdim olunub

Bakı. 12 iyun. REPORT.AZ/ Dağıstan Respublikasında 14 yaşadək futbolçular arasında keçirilən "Caspian Cup" turnirində Anatoli Banişevski mükafatı təqdim olunub. "Report"un məlumatına görə, "Neftçi”nin əfsanəvi hücumçusu Anatoli Banişevskinin adını daşıyan mükafat turnirin ən yaxşı futbolçusuna verilib.

Bu şərəfə Gürcüstanın "Dinamo” (Tbilisi) komandasının üzvü Georgi Abuaşvili layiq görülüb. "Neftçi”nin futbolçusu Mirəli Əhmədov isə turnirin ən yaxşı müdafiəçisi seçilib. Əhmədov gürcüstanlı sabiq müdafiəçi Aleksandr Çivadzenin adını daşıyan mükafata sahib çıxıb.

Qeyd edək ki, "Caspian Cup"da Azərbaycanın 2 təmsilçisi mübarizə aparıb. "Neftçi" 8 komanda arasında 5-ci, "Qəbələ" isə sonuncu yeri tutub.