Çexiyalı məşqçi “Qəbələ” ilə oyunu dəyərləndirib: “Qələbəyə layiq çıxış etdik”

“Qəbələ” ilə oyunda qələbəyə layiq çıxış etdik”.

“Report” xəbər verir ki, bunu Çexiyanın “Teplitse” klubunun baş məşqçisi Jiri Yaroşik “Qəbələ” ilə Türkiyədə keçirilən yoxlama görüşü barədə danışarkən deyib.

46 yaşlı çexiyalı mütəxəssis 2:1 hesabı ilə qalib gəldikləri görüşdə oyunçularının performansından razılıq bildirib: “Yüksək səviyyədə olan meydançada güclü rəqiblə qarşılaşdıq. Qələbəni yüksək qiymətləndirirəm. Matçın əvvəllərində buraxdığımız axmaq qolu nəzərə almasaq, qələbəyə layiq idik”.

Qeyd edək ki, bu gün Azərbaycana qayıdacaq “Qəbələ” Antalya toplanışında 3 yoxlama görüşü keçirib. Elmar Baxşıyevin yetirmələri ilk iki matçında “Sepsi” (Rumıniya – 2:2) ilə bərabərə qalıb, “Lukenvalde”yə (Almaniya – 3:2) qalib gəlib.