Cərəyan vuran futbolçu komadan ayıldı

Elektrik cərəyanı vurduqdan sonra reanimasiyaya yerləşdirilən İtaliyanın "Verona" klubunun futbolçusu Andrea Qrezele komadan ayılıb.

"Report" "Sky Sport"a istinadən xəbər verir ki, gənclər komandasında çıxış edən 19 yaşlı müdafiəçinin şüuru yerindədir. Qollarında və ayaqlarında hərəkət pozuntusu müşahidə olunmur. O, insanları tanıyır və hətta bir az danışır.

Futbolçu hazırda həkimlərin nəzarəti altındadır.

Qeyd edək ki, Andrea Qrezeleni fevralın 6-da dəmir yolunun yaxınlığında elektrik cərəyanı vurub. Hasarın üstündən keçmək istəyən oyunçu bilmədən yüksək gərginlikli naqillərə toxunub. Nəticədə o, 4 metr hündürlükdən yerə yıxılıb.