Bakı. 14 may. REPORT.AZ/ Azərbaycanlı hakim Rza Məmmədov İngiltərədə 17 yaşadək futbolçulardan ibarət komandalar arasında keçirilən Avropa çempionatının final mərhələsində növbəti təyinat alıb.
"Report"un UEFA-nın saytına istinadən verdiyi məlumata görə, FİFA referisinin köməkçisi 1/4 final mərhələsində Belçika-İspaniya oyununda yan xətt hakimi funksiyasını yerinə yetirəcək. Qarşılaşmanın baş hakimi irlandiyalı Rob Harvey olacaq.
Qeyd edək ki, Belçika-İspaniya matçı bu gün Bakı vaxtı ilə saat 16:00-da başlanacaq. Avropa çempionatının final mərhələsinə mayın 20-də yekun vurulacaq.