Azərbaycanın legioner futbolçu sayı üzrə dünyadakı yeri bəlli oldu

Beynəlxalq İdman Araşdırmalar Mərkəzi (CIES) 2019-cu ildə ölkələrindən kənarda oynamağa gedən futbolçuların sayı ilə bağlı araşdırma aparıb.

“Report”un məlumatına görə, 183 ölkənin yer aldığı siyahıda Azərbaycan Qazaxıstan, Tacikistan, Malavi və Esvatini ilə birgə 114 - 118-ci pillələrdə qərarlaşıb. CIES-in araşdırmasına əsasən, ötən il bu 5 ölkənin 8 oyunçusu legioner həyatı yaşayıb. Onların hamısı getdikləri ölkələrin yüksək liqalarında çıxış edib.

Siyahıya 1 600 futbolçu ilə Braziliya başçılıq edir. Onlardan 75,6 faizi əsas çempionatlarda forma geyinir. Fransa (1 027 futbolçu, 74 faiz əsas liqalar) ikinci, Argentina (972 oyunçu, 75 faiz əsas liqalar) üçüncü yerdə qərarlaşıb.