Azərbaycan millisinin üzvü: "İkinci yer uğrunda Gürcüstanla mübarizə aparacağıq"

"Düşünürəm ki, qrupda ikinci yeri tutmaq üçün Gürcüstan komandası ilə mübarizə aparacağıq".

"Report"un məlumatına görə, bunu futzal üzrə Azərbaycan millisinin üzvü Eduardo Borges Niderlandda keçiriləcək Avropa çempionatı ilə bağlı "Hln.be" saytına açıqlamasında deyib.

36 yaşlı oyunçu İspaniyanın futzalda lider ölkə olduğunu bildirib: "Ötən müddət ərzində Azərbaycan yığması bir neçə dəfə beynəlxalq arenada yaxşı çıxış edib. Ümid edirəm ki, biz bu yolu davam etdirə biləcəyik".

Qeyd edək ki, Azərbaycan millisi D qrupunda Bosniya və Herseqovina, Gürcüstan və İspaniya ilə üz-üz gələcək. 19 yanvar - 6 fevralda gerçəkləşəcək yarış ilk dəfə 16 komandanın iştirakı ilə keçiriləcək.