“Araz-Naxçıvan” tarixinin rekordunu təkrarlayıb

“Araz-Naxçıvan” bir mövsüm ərzində qazanılan qələbə sayında tarixinin rekordunu təkrarlayıb.

"Report" Peşəkar Futbol Liqasının rəsmi saytına istinadən xəbər verir ki, Elmar Baxşıyevin baş məşqçisi olduğu komanda cari çempionatda 9-cu dəfə qalib gəlib.

Naxçıvan təmsilçisi Misli Premyer Liqasının XIII turunda “Sumqayıt”ı bir qolla məğlub edib.

“Araz-Naxçıvan” bunadək mövsüm ərzində ən çox qələbəni ötən çempionat əldə edib. Komanda 2023/24 mövsümünün 36 görüşündə 9 dəfə üç xala sevinib. Bu dəfə Baxşıyevin yetirmələri eyni sayda qələbəni 13 matçda qazanıb. Növbəti qələbə yeni rekordla əlamətdar olacaq.

Qeyd edək ki, Naxçıvan klubu mübarizəni erkən dayandırdığı çempionatı nəzərə almasaq, yüksək dəstədə 4-cü mövsümünü keçirir.